Saıat-2018: Italııa men Ispanııadan qusbegiler keldi
TALDYQORǴAN. QazAqparat - Búgin Almaty oblysy Jambyl aýdanyndaǵy Kókbastaý atshabarynda qusbegilerdiń «Saıat-2018» atty halyqaralyq jarysy aıaqtaldy, dep habarlaıdy «Habar 24».
Oǵan elimizdiń búrkitshilerimen qatar Mońǵolııa, Reseı, Italııa, Ispanııa men Vengrııadan da qusbegiler qatysty. Saıatshylyq - ejelden kóshpendi halyqtyń ulttyq salty. Búginde ol ulttyq sport túri sanalady. Bıylǵy aıtýly sharaǵa elimizdiń 10 oblysynan jáne shetelden 60-qa jýyq qusbegi keldi.
Olar qarshyǵa, ıtelgi men qyran búrkitteriniń babyn synap kórdi. Kópshilikke qarshyǵalardyń kógershinderge túskeni qyzyq bolǵanyn kórdik. Sheshýshi syndaǵy básekede qarshyǵalar bir-birine des bermedi. Degenmen jeńimpaz bireý-aq. Tabıǵatta qarshyǵanyń negizgi qoregi qoıan, kepter, qyrǵaýyl men kekilik sııaqty ań-qustar. Búgingi jarysta Kókdaýyl atty qarshyǵa qoıanǵa da tústi, kepterdi de aldy. Sóıtip jarystyń bas júldesin jeńip aldy.
Dýlat Áben - qusbegiler otbasynyń kenjesi. Bul dástúr atadan balaǵa jalǵasyp keledi. Jarysqa Aqbalaq atty bir jastaǵy balapan búrkitin alǵash qosyp otyr. Ony byltyr jazda Alataý bókterindegi Baqaı taý quzyndaǵy uıadan alypty. Sóıtip mápelep, qanatyn qataıtyp ósirgen.
«Eń basynda tórt buryshtyń ishinde erkin júre alatyndaı qorǵanys jasaıdy. Búrkit ketip qalmas úshin. Oǵan kúndelikti et berý kerek. Mynanyń barlyǵy qap-qara bolyp, aıaǵy sarǵaıady»,- deıdi jas qusbegi Dýlat Áben.
Ulttyq dástúr ulyqtalǵan jarysta Italııa men Ispanııadan kelgen qonaqtar da qyrandarynyń babyn baıqap kórdi. Eń qyzyqty báseke búrkitterdiń túlki men qarsaq alýynda boldy. Bul synda Shyǵys Qazaqstan oblysynan kelgen Ómirbek Nuǵymannyń búrkiti túlkige múdirmeı túsip, jarystyń bas júldesin ıesiniń qanjyǵasyna baılady. Júldeli qusbegilerdiń barlyǵy arnaıy dıplom alyp, aqshalaı syılyqpen marapattaldy. Shara sońynda ulttyq ánder áýelep, el rýhyn asqaqtatqan jyr oqyldy.
«Men qazaqpyn as berip, at shaptyrǵan. Bıe baılap, tóskeıde qoı baqtyrǵan. Kók táńirisi qyrandy qolǵa úıretip, jer taǵysy túlkimen oınattyrǵan. Men qazaqpyn aqjúrek ańqyldaǵan. Kóńili jomart, nıeti aq sarqylmaǵan. Jer betine tarydaı shashylsam da, dalamdaı saqtap keldim dańqymdy aman», - deıdi qusbegi Táttimbet Kápuly.
