Saıası júıe zaman talabyna saı jańǵyrýy kerek – Ýaılder Alehandro Sanches

ASTANA. KAZINFORM – Úkimet – tiri aǵza sekildi júıe, sondyqtan ol ishki jáne jahandyq jaǵdaılarǵa saı beıimdelip otyrýy qajet. Sol sııaqty, barlyq memlekettik ınstıtýt óz mindetterin tıimdi atqarý úshin qaıta jańǵyryp turýy tıis. 

Bul týraly Vashıngtondaǵy Second Floor Strategies LLC konsaltıngtik kompanııasynyń prezıdenti Ýaılder Alehandro Sanches Kazinform agenttiginiń menshikti tilshisine bergen suhbatynda aıtty.

V Ulttyq quryltaıda jarııalanǵan saıası ózgerister týraly pikir bildirgen sarapshy álemdegi kóptegen el zań shyǵarýshy bıliktiń ártúrli úlgilerin qarastyryp jatqanyn aıtady. Máselen, Perýde 2026 jyldyń sáýir aıynda birpalataly júıeden ekipalataly parlamentke kóshý aıasynda senatorlar men depýtattardy saılaý josparlanǵan.

Osy tusta «qaı sheshim durys?» degen oryndy suraq týyndaıdy. Qysqasy, eń durys model – Qazaqstan halqyna naqty paıda ákeletin júıe.

– Eger birpalataly júıe parlament pen jalpy memlekettik apparattyń halyq ıgiligi úshin tıimdi jumys isteýine múmkindik berse, onda bul oryndy sheshim, - dep esepteıdi Ýaılder Alehandro Sanches.

Sarapshynyń pikirinshe, bolashaq Quryltaı jumysyna áıelderdiń, jastardyń jáne múmkindigi shekteýli azamattardyń qatysýy úshin memleket tarapynan jan-jaqty qoldaý kórsetilýi asa mańyzdy. Bul jańa organ Qazaqstan halqynyń barsha ókilin qamtýy tıis.

– Halyq keńesin qurý bastamasy óte qyzyqty. Onyń quramyna úkimettik emes uıymdar men etnostyq toptardyń ókilderi enetini unaıdy, - dedi amerıkalyq sarapshy.

Sanches Halyq keńesi halyq múddesine saı kelmeıtin bastamalar men jobalarǵa qatysty basqa memlekettik organdarmen kelispeı, óz ustanymyn ashyq bildire alýy kerek dep sanaıdy.

Sondaı-aq ol Qazaqstanda vıtse-prezıdent ınstıtýtyn qurý bastamasyn qoldaıtynyn jetkizdi.

– Vıtse-prezıdent laýazymyn qaıta engizý qısyndy qadam. Bul basqarý júıesiniń turaqtylyǵyn saqtaýǵa jáne daǵdarys jaǵdaıynda bıliktiń sabaqtastyǵyn naqty aıqyndaýǵa múmkindik beredi. Aımaqtaǵy keıbir elderde bılik sabaqtastyǵy naqty aıqyndalmaǵandyqtan, túrli saıası daǵdarystar týyndaǵanyn kórdik. Sondyqtan «belgisiz aımaqtardy» joıyp, memlekettiń tıimdi jumys isteýin qamtamasyz etý mańyzdy, - dedi Ýaılder Alehandro Sanches.

Eske sala keteıik, AQSh-taǵy The Atlantic Council’s Eurasia Center-diń shtattan tys ǵylymı qyzmetkeri, Eýrazııa jónindegi sarapshy Mark Temnıtskıı Qazaqstannyń saıası júıesindegi jańashyldyqtardy baǵalady.