Saıası jaýapkershilik endi búkil partııaǵa júkteledi - Indıra Áýbákirova
ASTANA. KAZINFORM – Búgin OSK janyndaǵy Saraptamalyq keńestiń altynshy otyrysynda jańa Konstıtýtsııa jaǵdaıyndaǵy saılaý zańnamasyn iske asyrý máseleleri talqylandy. Jıynda keńes múshesi Indıra Áýbákirova jańa zańnama saıası partııalardyń jaýapkershiligin kúsheıtetinin aıtty.
Onyń sózinshe, endi saılaýshynyń tańdaýy jeke kandıdatpen shektelmeıdi.
– Buǵan deıin saılaý protsesinde negizgi nazar jeke kandıdatqa aýdarylyp kelse, endi saıası partııanyń orny aıqyndala tústi. Saılaýshy tek adamǵa ǵana daýys bermeıdi. Ol óziniń ómirin jaqsartýǵa baǵyttalǵan ıdeıalarǵa, qundylyqtarǵa jáne sol ıdeıalardy júzege asyratyn komandaǵa tańdaý jasaıdy. Osylaısha, azamat belgili bir partııanyń eldi basqarýǵa qanshalyqty daıyn ekenine baǵa beredi. Shyn máninde, ol tańdaýyn jeke kandıdatpen ǵana emes, saıası partııamen baılanystyrady, – dedi Indıra Áýbákirova.
Sarapshynyń pikirinshe, osy ózgeristerden keıin ár kandıdatqa qoıylatyn talap ta ózgeredi.
– Ár kandıdat endi jeke saıası tulǵa ǵana emes, partııanyń bet-beınesi. Sondyqtan bir depýtattyń jibergen qatesi búkil partııanyń qatesi retinde qabyldanady. Saıası jaýapkershilik jeke adammen ǵana shektelmeıdi. Ol búkil partııaǵa júkteledi. Partııa óz parlamenttik komandasy úshin tek saılaý ótken kúni emes, búkil ókilettik merzimi boıy jaýap beredi, – dedi ol.
Sonymen qosa, sarapshylar jańa konstıtýtsııalyq jaǵdaıdaǵy saılaý quqyǵyn damytý máselelerin, Quryltaı depýtattaryn saılaýdy ótkizýdiń erekshelikterin, saılaý aldyndaǵy úgitti quqyqtyq retteýdi, azamattardyń saılaý quqyqtaryn iske asyrý kepildikterin keńeıtýdi, sondaı-aq saılaýdy qarjylandyrý tetikterin jetildirý máselelerin qarastyrdy.
Talqylaý qorytyndysy boıynsha qatysýshylar jańartylǵan zańnamany tıimdi iske asyrý jańa quqyqtyq tetikterdi birizdi túsinýdi jáne olardy saılaý protsesiniń barlyq qatysýshylary tarapynan dáıekti túrde qoldanýdy talap etetinin atap ótti. Sarapshylardyń usynystary Ortalyq saılaý komıssııasynyń saılaýdy daıyndaý jáne ótkizý jónindegi aldaǵy jumysy barysynda qaralatyn bolady.
Eske sala keteıik, búgin Astanada Ortalyq saılaý komıssııasy janyndaǵy Saraptamalyq keńestiń otyrysynda jańa Konstıtýtsııaǵa sáıkes ázirlengen saılaý zańnamasyndaǵy ózgerister talqylanyp jatyr.
