Saıası jańǵyrýdyń múldem jańa kezeńine qadam bastyq – Toqaev jańa Konstıtýtsııanyń jobasy týraly

ASTANA. KAZINFORM - Qazaqstan «sýperprezıdenttik» modelden bas tartyp, tejemelik ári tepe-teńdik júıesi tıimdi jumys isteıtin prezıdenttik respýblıka úlgisine ótti. Bul týraly Pákistannyń The News International gazetine suhbat bergen Memleket basshysy Qasym-Jomart Toqaev aıtty.

- El tarıhynda eń eleýli saıası transformatsııa úderisi júrip jatyr. Bul ózgerister damýdyń ıgiligin qoǵamda ádil bólýdi maqsat etedi. Memlekettiń irgesin bekemdeý jolyndaǵy barlyq qam-qareketimiz elimizdi jańǵyrtýǵa, shyn máninde Ádiletti Qazaqstannyń negizin qalaýǵa baǵyttalǵan, - dedi Memleket basshysy.

Qasym-Jomart Toqaev Qazaqstan «sýperprezıdenttik» modelden bas tartyp, tejemelik ári tepe-teńdik júıesi tıimdi jumys isteıtin prezıdenttik respýblıka úlgisine ótkenine nazar aýdartty.

- Ol, eń aldymen, «Kúshti Prezıdent – yqpaldy Parlament – esep beretin Úkimet» tujyrymdamasyna arqa súıeıdi. Qazir biz saıası jańǵyrýdyń múldem jańa kezeńine qadam bastyq. Konstıtýtsııalyq reforma aıasyndaǵy eń basty ózgeristerdiń qatarynda bir palataly parlamentke (Quryltaı) ótý, Halyq Keńesin qurý jáne Vıtse-prezıdent laýazymyn engizý sekildi bastamalar bar. Adam quqyqtary men bostandyqtary memlekettiń negizgi basymdyǵy retinde jarııalanady. Al yntymaq pen birlik, etnosaralyq jáne konfessııaaralyq kelisim sekildi qundylyqtar memlekettigimizdiń myzǵymas tuǵyry bolyp qala beredi, - dedi Prezıdent.

Budan buryn habarlanǵandaı, Prezıdent Qasym-Jomart Toqaev Pákistanǵa memlekettik saparmen bardy.