Saıası turaqsyzdyq Túrkııa ekonomıkasyn qurtyp jatyr – qarjy sarapshylary

ASTANA. KAZINFORM –Túrkııanyń ishki saıasatyndaǵy turaqsyzdyq Ortalyq bankke qosymsha qıyndyqtar týdyryp, el ekonomıkasyna aıtarlyqtaı keri áserin tıgizip jatyr, dep habarlaıdy Kazinform agenttiginiń menshikti tilshisi.

Keıingi ýaqyttaǵy oqıǵalardyń saldarynan bolǵan saıası belgisizdik jaǵdaıynda sarapshylar ulttyq valıýtanyń devalvatsııasy men ınflıatsııalyq táýekelderdi tejeý úshin paıyzdyq stavkalardyń kóterilý múmkindigi týraly eskertti.

Strateg Tımotı Eshtiń pikirine silteme jasaǵan Karar basylymynyń habarlaýynsha, bılik ókilderi lıranyń baǵamyn qoldaý úshin valıýtalyq rezervterdi paıdalanýy múmkin. Bul uzaq ýaqytty qajet etpeıtin qadam.

Esh paıyzdyq stavkalarǵa ózgeris engizbese lıra qunsyzdana beretinin, óz kezeginde ol túrik ekonomıkasyna degen ınflıatsııalyq qysymdy arttyratynyn jetkizdi.

Qazir qarjy naryǵyn dúr silkindirgen Ystanbul meri Ekrem Imamoglýdyń ustalýynan keıingi jaǵdaı erekshe alańdatyp otyr.

Óıtkeni osy oqıǵadan keıin Túrkııa valıýtasynyń quny quldyrap, bir dollardyń baǵasy 40 lıradan astyp tústi, al bir eýro 42,5 lıra boldy.

Oǵan jaýap retinde BIST 100 ındeksteri 7% quldyrady. Bul degenińiz jaǵdaıdyń qalaı bolary belgisiz, al ınvestorlar Túrkııa ekonomıkasyna kúmánmen qaraı bastaıdy degen sóz.

Qarjy sarapshylarynyń pikirinshe, jaǵdaı jaqyn arada turaqtanbasa, Túrkııa budan da kúrdeli ekonomıkalyq problemalarǵa tap bolýy múmkin. Olardy eńserý úshin Ortalyq bank qatań sharlardy qoldanýǵa májbúr bolady.

Osyǵan deıin Túrkııanyń ulttyq valıýtasy qunsyzdanyp jatqany týraly habarlaǵan edik.

Sondaı-aq Túrkııa bıligi Ystanbul meri ustalǵannan keıin sherýge shyǵýǵa tyıym saldy.