Saıası shıeleniske baılanysty Japonııa qytaı pandalaryn qaıtarýǵa májbúr
ASTANA. KAZINFORM — Aldaǵy 50 jyl ishinde alǵash ret Japonııa zooparkterinde qytaı pandalary bolmaıdy. Qytaıdan jalǵa alynǵan egiz pandalar 2026 jyldyń qańtar aıynda óz otanyna qaıtarylady, dep jazdy Anadoly.
Kyodo agenttiginiń habarlaýynsha, Tokıo bıligi 2021 jyly Ýeno zoobaǵynda dúnıege kelgen «Sıao Sıao» jáne onyń ápkesi «Leı Leı» atty pandalardyń eki el arasyndaǵy janýarlardy ýaqytsha berý jónindegi kelisimge sáıkes qańtar aıynyń sońyna deıin Qytaıǵa qaıtatynyn málimdedi.
Resmı habarlamada kelýshiler egiz pandalardy sońǵy ret 25 qańtarda kóre alatyny aıtylǵan.
Japonııa Mınıstrler kabınetiniń bas hatshysy Kıhara Mınorý:
– Biz pandalar arqyly qalyptasqan baılanystardyń aldaǵy ýaqytta da jalǵasýyna úmittenemiz, – dep málimdedi.
Onyń aıtýynsha, mundaı almasýlar uzaq jyldar boıy Japonııa men Qytaı halyqtary arasyndaǵy ózara túsinistik pen qoǵamdyq qabyldaýdyń jaqsarýyna yqpal etken.
Tokıodaǵy pandalar Qytaıdyń menshigi bolyp sanalady, sebebi olar QHR Japonııaǵa pandalardy kóbeıtý men zertteý baǵdarlamasy aıasynda bergen ata-analardan týǵan.
Sonymen qatar, Japonııa men Qytaı arasyndaǵy qarym-qatynastyń shıelenisýine baılanysty endigide pandalardy jalǵa alý múmkindigi ázirge belgisiz bolyp otyr. Dástúrli túrde pandalar eki el arasyndaǵy dostyqtyń sımvoly sanalady.
Buǵan deıin Japonııanyń batysyndaǵy haıýanattar baǵynan nesıege alynǵan 4 alyp pandanyń barlyǵy Qytaıǵa keri qaıtarylatynyn jazǵan edik.
