Saıası sarapshy: BUU basshylyǵy beıbitshilikke shaqyrýda Qazaqstandy kóshbasshy el dep biledi

ASTANA. QazAqparat - Jappaı qarýsyzdyndyrý jáne ıadrolyq qarýlardyń taralmaýy ustanymyna kelgende BUU basshylyǵy Qazaqstandy árdaıym moıyndalǵan, kóshbasshy el dep biledi. Qazaqstannyń BUU Qaýipsizdik Keńesine tóraǵalyq etýine qatysty QR Prezıdenti janyndaǵy strategııalyq zertteýler ınstıtýty dırektorynyń orynbasary, saıasattaný ǵylymynyń doktory Sanat Kóshkinbaev osylaı dep pikir bildirdi, dep habarlaıdy «QazAqparat» HAA tilshisi. 

«Qazaqstan Birikken Ulttar Uıymy Qaýipsizdik Keńesine tóraǵalyq etý mindetin bastap ketti. Eń aldymen aıta keterligi, osynaý qym-qýyt zamanda jahandyq qaýipsizdik júıesi kóńil qýantarlyq jaǵdaıda bolmaı tur. Álem halqy aldynda búgingi kúni jedel ári tıimdi túrde jaýap berýdi talap etetin syn-kedergiler az emes. Naqtyraq aıtqanda, halyqaralyq terrorızmniń ýshyǵyp turǵany, azyq-túlik jáne sý qaýipsizdigine qatysty máseleler, Afrıka men Taıaý Shyǵystaǵy qaqtyǵystar men ıadrolyq qarýlar týraly áńgimeniń shyǵýy, álbette, adamzatty alańdatady. Ózderińiz biletindeı, Koreıa túbegindegi qazirgi ahýal - bir tarap shalys qadam jasasa, otqa oranar jaǵdaıda», - deıdi sarapshy.

Sanat Kóshkinbaevtyń pikirine qulaq assaq, Qazaqstan Prezıdenti Nursultan Nazarbaev óz sózinde «basym baǵyttardyń biri - qaýipsiz, ádiletti ári gúldengen álemdi qurý úshin jahandyq yntymaqtasty nyǵaıtý» dep pikir bildirgen.

«18 qańtarda Prezıdent Nursultan Nazarbaevtyń tóraǵalyq etýimen Qaýipsizdik Keńesinde «Jappaı qyryp-joıýǵa arnalǵan qarýdyń taralmaýy: Senim sharalary» taqyrybynda joǵary dárejede debat ótkizilgeli jatyr. Osyǵan deıin ózderińiz biletindeı, Prezıdentimiz BUU-nyń 100 jyldyǵy tusynda, ıaǵnı 2045 jylǵa qaraı Qazaqstan álem elderine jappaı atom qarýlarynan bas tartý týraly bastama kótergen edi. Sondyqtan, dál osy másele kóteriletin jıynǵa BUU Bas hatshysy Antonıo Gýterrısh, ártúrli memleketterdiń joǵary deńgeıdegi ókilderi, sonymen birge syrtqy ister mınıstrleri, Qaýipsizdik Keńesiniń músheleri qatysady dep kútilýde. Osy tusta BUU Bas hatshysy Antonıo Gýterrısh Qazaqstannyń bitimgerlik baǵytyndaǵy ustanymyna tolyǵymen qoldaý bildirip otyrǵanyn aıta ketý kerek», - deıdi Sanat Kóshkinbaev.

Onyń paıymdaýynsha, BUU basshylyǵy qazirgi ýaqytta qarýsyzdyndyrý jáne ıadrolyq qarýlardyń taralmaýy ustanymyna kelgende Qazaqstannyń árdaıym kóshbasshy ekenin moıyndaıdy.

«Demek, Qazaqstan bul salada halyqaralyq kelisimderdiń uıytqysy bola bilgeni sózsiz. Sol sebepti, ózdigimen ıadrolyq qarýlardan bas tartqan Qazaqstannyń abyroıy barshylyq», - deıdi ol.

Sarapshy sonymen birge, aımaqtyq qaýipsizdikti nyǵaıtý baǵytynda Ortalyq Azııanyń múddesin alǵa tartqan Qazaqstannyń ustanymy da nazardan tys qalmaıtynyn aıtady.

Tarqata aıtqanda, 19 qańtarda Ortalyq Azııa men Aýǵanstan memleketiniń syrtqy ister mınıstrleriniń qatysýymen mınıstrlik debat ótkizilmek. Onda Aýǵanstan men Ortalyq Azııada aımaqtyq yntymaqtastyqty qurý máselesi kóteriletin bolady.

«Qazaqstan tarapy ustanyp otyrǵan qaǵıdattyń mazmuny mynadaı: Aýǵanstandy beıbitshilik protsesterinen keri ıtermeı, ony ekonomıkalyq kóshke ilestirý. Aýǵanstan ózge memleketter sekildi terrorızmniń qurbany bolyp otyrǵanyn umytpaý kerek. Ondaǵy másele Aýǵanstandy shetke ysyrýdan túzelmeıdi. Ol memleketti terrorızmniń oshaǵy retinde kóretin taptaýryn kózqarastan aıyrylǵan abzal. Álbette, Qazaqstan tarapynyń bul ustanymy Aýǵanstanǵa úlken múmkindik berip otyr. Eń bastysy, Aýǵanstan bıligi bul ustanymǵa biraýyzdan qoldaý bildirýde. Kóptegen memleketter burynǵy kózqarastan, ıaǵnı «Aýǵanstan - qaqtyǵystyń oshaǵy» degen túsinikten aryla almaı keledi. Al máselege basqa jaǵynan qaraý kerektigin Qazaqstan tarapy barynsha túsindirip bermek. Aýǵanstan shamasy kelgenshe terrorızmmen kúresýde. ıAǵnı, burynǵy túsinikterdi ajyratyp, konstrýktıvti alańda bas qosýdyń mańyzy zor», - deıdi sarapshy.