Saıası sahnamyzdaǵy eń eleýli oqıǵa bolmaq - sarapshy
Naýryz merekesi qarsańynda elimiz úshin aıtýly jańalyqqa, Elbasynyń óz erkimen prezıdenttik ókiletten bas tartqanyna kýá boldyq. Endi saıası sahnamyzda taǵy bir eleýli oqıǵa oryn almaq. El Konstıtýtsııasyna sáıkes, Qazaqstan Respýblıkasy Prezıdentiniń kezekten tys saılaýy 2019 jyldyń 9 maýsymynda ótedi. Professor Qalqaman Jaqyptyń pikirinshe, bul - ýaqytyly qabyldanǵan utymdy sheshim.
«QR Prezıdenti Qasym-Jomart Toqaevtyń úndeýiniń tolyq mátinin oqyp shyqtym. Rasynda da, elimizdiń keleshegi, ár otbasy men ár azamattyń taǵdyry halyqtyń sheshimine baılanysty. Búgingi Qazaqstan álemdik saıası arenada óziniń laıyqty ornyn aldy. Bizdi bedeldi memleket retinde kúlli álem moıyndaıdy. Bizben sanasady», - deıdi Qalqaman Jaqyp.
Professor aldaǵy saılaýdyń taza, ashyq ári ádil ótetinine senimdi ekenin aıtty.
«Birinshiden, bul jolǵy merziminen burynǵy saılaý tolyǵymen zań aıasynda, ádil ótedi. Ekinshiden, Prezıdent saılaýynyń eldegi áleýmettik, saıası, rýhanı salalardy tıimdi damytýǵa áser etetini ras. Tez ózgerip, myń qubylyp turǵan zamanda ishki jáne syrtqy saıasatty ustap turý úshin eldi jeteleıtin basshy qajet. Odan soń álemdegi ozyq 30 eldiń qataryna ený mindetine qaraı jyljı beremiz degen oıdamyn. Prezıdenttiń «kezekten tys saılaý týraly sheshim qabyldaý - óte mańyzdy ári qajetti qadam» deýi oryndy. Óıtkeni, Elbasy memleket basyna jańa býyn kelip, jańashyl ıdeıa men tyń reformanyń kórinis tabýynan zor úmit kútip otyr. Al 9 maýsymnan keıin bılik basyna keletin tulǵa ózine artylǵan úlken jaýapkershilikti arqalap, buǵan deıingi júzege asyrylǵan saıasatymyzdy el-jurtpen birge jarqyn bolashaqqa bastaıtynyna senimim zor», - dep atap ótti ol.
Aıta keteıik, Memleket basshysy Qasym-Jomart Toqaev respýblıkalyq telearnalar arqyly Qazaqstan halqyna úndeý joldady. QazAqparat Prezıdent úndeýiniń tolyq mátinin jarııalaǵan bolatyn.
