Saıası reformalardyń jańa paketinen oń nátıjeler bolady - Baný Nurǵazıeva

NUR-SULTAN. QazAqparat – Prezıdent jarııa etken bastamalar júzege asyrýǵa laıyqty qadamdardy qamtyp tur. Bul týraly Qazaqstan Azamattyq alıansynyń prezıdenti Baný Nurǵazıeva málim etti, dep habarlaıdy QazAqparat tilshisi.

«Árıne, saıası reformalardyń jańa paketi jigerlendiredi, sondaı-aq Prezıdenttiń osyǵan deıingi reformalarynyń sabaqtastyǵyn kórsetip tur. Osy oraıda Memleket basshysy bastapqydan jarııa etken bastamalar baǵytymen kele jatyr», - dedi Baný Nurǵazıeva «Prezıdenttik jańa saıası reformalar paketi» taqyrybyndaǵy saraptamalyq talqylaý barysynda.

Bul turǵyda ol barlyq bastamalardy qoldaıtynyn, sondaı-aq budan ary qaraı jańa áleýmettik bastamalar jalǵasa beretinine senimdi ekenin jetkizdi.

«Jalpy, azamattyq qoǵam áleýeti qandaı? Ótken jyly qarasha aıynda barlyq oblystarǵa saparmen baryp, azamattyq qoǵam ókilderimen kezdestim. Atap aıtqanda, qazirgi kezde jaǵdaı ózgerdi, saıası keńistik ózgerdi. Bul salaǵa jastar kelip jatyr jáne olar túrlený qadamdaryna daıyn. Sonymen qatar, saılaý kezinde baıqaýshy bolýǵa qyzyǵýshylyq tanytqandar kóp kezdesti. Ony biz jaqsy kórsetkish dep baǵaladyq, sebebi qoǵam tarapynan belsendilik artyp keledi», - Baný Nurǵazıeva.

Budan buryn habarlanǵandaı, búgingi sarapshylyq talqylaýǵa saıası partııalardyń, úkimettik emes uıymdardyń ókilderi, zańgerler, tanymal saıasattanýshylar qatysty.

QR Prezıdenti janyndaǵy QSZI dırektorynyń orynbasary Sanat Kóshkimbaev Prezıdenttiń usynǵan jáne júzege asyrylǵan bastamalarynyń basym bóligi memleket pen qoǵam arasyndaǵy baılanys tetikterin jetildirýge negizdelgenin aıtty.