Saıası reforma da, halyqtyń áleýmettik ál-aýqatyn kóterý de mańyzdy – dóńgelek ústel
Іs-sharaǵa Ermuhamet Ertisbaev, Aıqyn Qońyrov, Erlan Saırov, Mádına Nurǵalıeva, Ashat Rahymjanov, Ǵazız Ábishev syndy saıası qaıratkerler, saıasattanýshylar jáne basqa da sarapshy mamandar qatysty.
SARAP eksperttik klýbynyń otyrysyn ashqan Qazaqstandyq qoǵamdyq damý ınstıtýtynyń Basqarma tóraǵasy Qazbek Ómirzaquly kún tártibindegi qazaqstandyq saıası ómirdiń negizgi jańǵyrý tetikteri men AMANAT partııasynyń rebrendıngi jónindegi pikirlerimen bólisti.
Búgingi kúni qalyptasqan jaǵdaı boıynsha partııanyń damýy servıstik jáne «adamǵa baǵyttalǵan» modelde bolýy shartty ekenin ataǵan Basqarma tóraǵasy elimizdegi eń úlken saıası qurylymnyń halyq pen bılik arasyndaǵy negizgi baılanys kózi bolyp qala beretinin aıtty.
«Bizdiń búgingi kezdesýimiz qańtar aıyndaǵy qaıǵyly oqıǵalardan keıin kún tártibindegi «Jańa Qazaqstandy» qurýdyń jáne memlekettik saıası júıeniń tolyq transformatsııalaný protsesin sarapshy-mamandarmen birge jan-jaqty talqylaýǵa baǵyttalǵan. Búgingi tańda resmı bılik úkimettiń quramyn jańartýdan bastap, bıleýshi partııanyń tolyq rebrendıngimen osy úlken mindetti oryndaýǵa kiristi. Bul tujyrymdamanyń basty maqsaty – júıeli reformalar arqyly halyqtyń áleýetin kóterý jáne qoǵamnyń tutas, turaqty damýyn uıymdastyrý», – dedi QQDI Basqarama tóraǵasy.
Sarapshylardyń pikirinshe, jyl basyndaǵy Prezıdent Qasym-Jomart Toqaev jarııalaǵan «Jańa Qazaqstan» tujyrymdamasy elimizdiń áleýmettik-ekonomıkalyq ınfraqurylymyn túbegeıli ózgertip, el tarıhyndaǵy jańa dáýirdiń bastaýy bolýy kerek. Olar qańtardaǵy oqıǵalar qazaqstandyqtardyń saıası belsendiligine qalaı áser etkenin jáne azamattardyń saıası kóńil-kúılerine ózekti ólsheýler júrgizý qajettigin erekshe atap ótti.
Ermuhamet Ertisbaev Qazaqstandaǵy partııalardyń aldynda úlken mindet turǵanyn, ol eń aldymen Prezıdent Ákimshiligine júkteletinin atap ótti.
«Prezıdent Ákimshiligi eldegi saıası menedjmentti júzege asyrady. Bul baǵytta, onyń ishinde partııanyń turaqty quramyn qysqartý boıynsha da aýqymdy jumystar júrgizilip jatqanyn bilemin. Kúrdeli halyqaralyq jaǵdaıǵa qaramastan jańa saıası partııalardy tirkeý múmkindikterdi qajet etedi. Bul turǵyda AMANAT partııasyna ońaı bolmaıdy, degenmen partııanyń tájirıbesi, qurylymy, adamy, apparaty bar», – dedi Ermuhamet Ertisbaev.
Erlan Saırovtyń aıtýynsha, jalań saıası reforma eldegi máseleni túpkilikti sheshpeıdi. Ol úshin eń aldymen halyqtyń áleýmettik ál-aýqatyn kóterý kerek.
«Saıası reforma kerek. Alaıda jalań saıası reforma jasap, Parlamentke 5-6 partııany kirgizip, azamattardyń barlyǵy saıasatqa aralasyp, biraq áleýmettik modernızatsııa jasamasaq onda qandy qańtardyń qaıtalanýy ábden yqtımal. Demek saıası turaqtylyqty qalypqa keltirý tek qana saıası reformalarmen shektelmeıdi. Eń aldymen halyqtyń áleýmettik deńgeıin kóterý kerek. Bizdegi 19 mln halyqtyń 1 mıllıonynyń áleýmettik deńgeıi eń tómengi kúnkóris deńgeıinen tómen», – degen E.Saırov shekara aımaqtardaǵy aýyldardyń ınfroqurylymyn damytýdyń mańyzdy ekenin de atap ótti.
Halyqtyń aryz-shaǵymynyń 60 paıyzy sot sheshimderine baılanysty ekenin aıtqan ol sot ınstıtýtyna da ózgerister kerek ekenin jetkizdi.
«Saıası aspekti degen kezde, birinshi, saılaý júıesine lıberalızatsııa jasaýymyz, ekinshi, áleýmettik modernızatsııa jasaýymyz kerek. Úshinshisiden, sot reformasy. Májiliske keletin aryzdardyń jáne aımaqtarda júrgendegi halyqtyń eń kóp aryzy sottardyń sheshimderine baılanysty bolady. Sottardyń sheshimderi túsiniksiz, logıkasyz, gýmanızmge sáıkes kelmeıtin bolyp ketken. Sondyqtan biz sot reformasyn da jasaýymyz kerek. Sottar da halyqtyń múddeesine jumys isteýi tıis», – dedi Erlan Saırov.
AMANAT partııasy qoǵamdyq saıasat ınstıtýtynyń dırektory Mádına Nurǵalıeva búginde qoǵamda memlekettik saıasatker-kásipkerlerge suranys óte joǵary ekenin atap ótti.
«Búgingi jaǵdaıda saıası partııalarǵa túsetin júk aýyrlaıdy. Óte kóp jumys istelýi kerek. Olardyń saıası jaýapkershiligin anaǵurlym aıqyn kórsetip, tıimdiligin dáleldeý kerek», – dedi ol.
Esterińizge sala keteıik, 2022 jylǵy 1 naýryzda Nur Otan partııasynyń kezekten tys XXII sezinde depýtattar AMANAT uıymynyń ataýyn ózgertýge daýys berdi. Sonymen qatar, partııanyń atqarýshy hatshysy Ashat Oralov partııany transformatsııalaý baǵdarlamasyn tanystyrǵan bolatyn.
