Saıası partııalardyń Májiliske ótý shegin 7-den 5 paıyzǵa tómendetýimiz kerek

NUR-SULTAN. QazAqparat -Saıası partııalardyń Májiliske ótý shegin 7-den 5 paıyzǵa tómendetýimiz kerek. Bul týraly 7-shi shaqyrylǵan Parlamenttiń 1-shi sessııasyn ashqan QR Prezıdenti Qasym-Jomart Toqaev aıtty, dep habarlaıdy QazAqparat tilshisi.

«Biz osy jolǵy saılaý naýqany karantın shekteýlerine qaramastan qanshalyqty qyzý ótkenine bárimiz kýá boldyq. Keıbir partııalardyń Májilis pen máslıhattarǵa ótýine sál ǵana daýys jetpeı qaldy. Olardyń árqaısysynda belgili bir salany jetik meńgergen, bilimdi, bilikti azamattar da bar. Solar Parlamenttiń bıik minberinen aıtýǵa tıis kóptegen ózekti máselelerdi der kezinde ári oryndy kóterip júr. Osyndaı partııalardyń ókilderi Parlamentke ótse, ondaǵy pikirtalasty qyzdyra túser edi, ortaq jumysqa tıimdi bolar edi», - dedi Memleket basshysy.

QR Prezıdenti mundaı azamattardyń zań shyǵarý jumysynyń sapasyn arttyrýǵa da súbeli úles qosary anyq ekendigin basa aıtty.

«Sondyqtan saıası partııalardyń Májiliske ótý shegin 7-den 5 paıyzǵa tómendetýimiz kerek. Osyndaı sheshimdi qabyldaıtyn ýaqyt keldi. Óıtkeni atalǵan norma zań júzinde tirkelgen partııalardy aldaǵy saılaýlarǵa qatysýǵa yntalandyrady. Sondaı-aq eldegi saıası básekeniń damýyna septigin tıgizedi. Bul bastama memlekettik saıasatty júrgizý úshin halyqtyń pikirin neǵurlym kóbirek qamtyp, eskerip otyrýǵa múmkindik beredi», - dedi Qasym-Jomart Toqaev.