Saıası partııalardyń Quryltaı saılaýy aldyndaǵy sońǵy teledebaty aıaqtaldy
ASTANA. KAZINFORM — Televızııalyq debatqa saıası partııalardyń tóraǵalary qatysty.
«Damyǵan ekonomıka — qýatty qoǵam» taqyrybyndaǵy sóz dodasynda tórt kezeń boldy.
Jobada saıası partııalar jetekshileri jerebe tartý nátıjesi boıynsha belgilengen myna rettilik boıynsha sóz tizginin aldy:
1. Respublica partııasynyń tóraǵasy — Aıdarbek Qojanazarov;
2. Baytaq partııasynyń tóraǵasy — Azamathan Ámirtaev;
3. «Aq jol» demokratııalyq partııasynyń tóraǵasy — Danııa Espaeva;
4. «Ádilet» partııasynyń tóraǵasy — Aıbek Dádebaı;
5. «Aýyl» partııasynyń tóraǵasy — Qaırat Aıtýǵanov;
6. Qazaqstannyń Jalpyulttyq sotsıal-demokratııalyq partııasynyń tóraǵasy — Ashat Raqymjanov;
7. Qazaqstan Halyq partııasynyń tóraǵasy — Nursultan Shoqanov.
Birinshi kezeńde ár qatysýshy óz partııasynyń saılaýaldy baǵdarlamasyn tanystyrdy. Olar nebári 2,5 mınýtta partııasynyń basty maqsattaryn, negizgi tujyrymdamasyn jáne buǵan deıin atqarǵan jumystaryn tanystyrýǵa tıis boldy. Árqaısysy halyqtyń áleýmettik jaǵdaıyn qalaı jaqsartatynyn málimdeýmen birge, ózge partııalardyń qyzmetin synǵa aldy.
Ekinshi kezeńde partııa basshylary bir-birine suraq qoıdy. Saýal joldaýǵa 1 mınýt, al oǵan jaýap berýge 2 mınýt berildi. Osylaısha, Quryltaı depýtattyǵyna úmitkerler bir-biriniń saılaýaldy baǵdarlamalarynan qandaı da bir kemshilik taýyp, sózden tuqyrtýǵa talpyndy.
Úshinshi kezeń de erekshe ótti. Óıtkeni, kórermender kókeıindegi suraqtaryn baılanys ortalyǵyna bir apta boıy joldady. Jalpy, 58 746 saýal jınaldy. Solardyń ishinen eń ózekti 14 suraq iriktelip, jeti partııa basshylaryna 2 saýaldan qoıyldy. Olardyń árqaısysyna qatysýshylar eki mınýt ishinde jaýap berýge mindetteldi.
Qorytyndy bólim tórtinshi kezeńde qatysýshylar elektoratqa qaıryldy. Olardyń árqaısysy 2 mınýt boıy bar sheshendik ónerin salyp, ýádeleri men josparlaryna buqarany sendirýge kúsh saldy. Jeti partııa tóraǵalary halyqtyń senimin aqtap, eldi órge súıreıtinin málimdedi.
Eske salaıyq, Quryltaı saılaýy aldyndaǵy teledebat osymen tórtinshi ret uıymdastyryldy. Sóz saıysy bul joly 24KZ telearnasynyń tikeleı efırinde kórsetildi.
