Saıası partııalardyń barlyǵy reformaǵa qatysty óz bastamalaryn joldaǵan — Natalıa Pan
ASTANA. KAZINFORM — Parlamentarızm ınstıtýtynyń dırektory Natalıa Pan azamattardan, sarapshylardan, qoǵamdyq birlestikterden e-Otinish jáne eGov platformalary arqyly kelip túsken usynystar týraly aqparat berdi, dep habarlaıdy Aqordanyń baspasóz qyzmeti.
Onyń sózinshe, birneshe aı ishinde saıası partııalardyń barlyǵy, ondaǵan úkimettik emes uıym, bıznes-qoǵamdastyq ókilderi, quqyqtanýshy ǵalymdar men sarapshylar konstıtýtsııalyq reformaǵa qatysty óz bastamalaryn joldaǵan.
— Parlamenttik reformadan bólek, Jumys tobyna azamattardan memlekettik qurylymnyń jalpy máseleleri men saıası jáne qoǵamdyq ınstıtýttardy jetildirýge qatysty 1,6 myńǵa jýyq usynys kelip tústi, — dedi Parlamentarızm ınstıtýtynyń dırektory.
Aıta keteıik, Astanada Prezıdent Qasym-Jomart Toqaevtyń qatysýymen Parlamenttik reforma jónindegi jumys tobynyń otyrysy ótti.
Budan buryn Vıtalıı Han parlamenttik reforma depýtattardyń halyq aldyndaǵy jaýapkershiligin kúsheıtetinin aıtqan edi.