Saıası partııalar saýatty jáne eldiń múddesine berilgen kandıdattardy usynýy kerek - Prezıdent
ASTANA. QazAqparat - Saılaý eldiń jáne halyqtyń múddesi úshin ótkiziledi. Búgin QR Parlamenti Májilisi depýtattarynyń merziminen buryn saılaýyn taǵaıyndaýǵa oraı Qazaqstan halqyna úndeý arnaǵan Elbasy Nursultan Nazarbaev osylaı dedi.
«El Konstıtýtsııasynyń talaptaryna sáıkes, Parlament Palatalary tóraǵalarymen, Premer-Mınıstrmen jáne Konstıtýtsııalyq Keńes tóraǵasymen konsýltatsııalar ótkizdim, sonyń qorytyndysy boıynsha depýtattardyń bastamasyn qoldaý sheshimi qabyldandy», - dep toqtaldy Memleket basshysy.
Bul turǵyda Prezıdent bıliktiń saılanatyn tarmaǵynyń jańarýy - eldiń jáne halyqtyń múddesi úshin jasalǵaly otyrǵanyn jetkizdi.
N. Nazarbaev saıası partııalar kún tártibindegi maqsattardy túsinýge qaýqarly saýatty, isker jáne eldiń múddesine berilgen kandıdattardy usynýy kerek ekenin qadap aıtty.
«Búgin men besinshi shaqyrylǵan Parlament Májilisiniń ókilettiligin merziminen buryn toqtatý týraly Jarlyqqa qol qoıdym. Májilistiń kezekten tys saılaýy 2016 jyldyń 20 naýryzyna taǵaıyndaldy», - dedi Memleket basshysy.
