Saıası partııalar oblys ákimderin partııaǵa múshe bolýdan shekteýge qarsy – Alma Muqanova

NUR-SULTAN. QazAqparat – QR Ádilet vıtse-mınıstri Alma Muqanova Ortalyq kommýnıkatsııalar qyzmetinde ótken brıfıngide oblys ákimderin saıası partııaǵa múshe bolýdan shekteý týraly pikir bildirdi, dep habarlaıdy QazAqparat tilshisi.

«Májilis depýtaty Azat Perýashev oblystaǵy ákimder de eshbir partııanyń quramynda bolmaý kerek degen usynys aıtyp júr. Sizdiń oıyńyzsha, bul qanshalyqty ádil», - dep surady jýrnalıst.

Vıtse-mınıstrdiń aıtýynsha, bul másele áli talqylanýy kerek.

«Prezıdent Joldaýyna qarasaq, saıasat pen memlekettik qyzmet bir-birine tym jaqyn bolmaý kerektigi týraly aıtylǵan. Ákimder boıynsha aıtsaq, Joldaýda partııanyń laýazymdy tulaǵalary óz jumysyn ákimdik jumyspen birge júrgizbeýi kerek dep aıtylǵan. Qazir biz pysyqtap jatqan zań jobada osyndaı túzetýler qarastyrylyp jatyr. Biraq bizde partııa usynǵan, partııanyń múshesi bolyp tirkelgen ákimder bar. Partııalarmen osy másele boıynsha tıisti kezdesýler ótkizgen bolatynbyz. Máselen, qazirgi tańda ákimniń óz ornyn bosatýynyń bir negizi partııa quramynan shyǵý bolyp tabylady. Partııalardyń buǵan kózqarasyn bilip kórdik», - dedi Alma Muqanova.

Aıtýynsha, partııalar ákimderdi óz qatarynan shyǵarýǵa qarsy.

«Olardyń ustanymy boıynsha ákim saıası partııanyń baǵdarlamasyn paıdalanyp shyqqan tulǵa bolyp esepteledi. Sondyqtan olar ákim partııa múshesi bolyp qala alýy kerek. Bul normany pysyqtap jatyrmyz. Óıtkeni biz tek óz kózqarasymyzben ǵana sheshim qabyldaı almaımyz. Saıası partııalardyń pikirin osy normany pysyqtaý kezinde mindetti túrde eskeremiz», - dedi vıtse-mınıstr.

Atalǵan brıfıngide «Namys» partııasyn tirkeý máselesi qaralyp jatqany da aıtyldy .