Saıası partııalar neni eskerýi kerek – saıasattanýshy pikiri
ASTANA. KAZINFORM – Saıasattanýshy Indıra Rystına «Quryltaı saılaýy: konstıtýtsııalyq negizder jáne saıası transformatsııa» degen ataýmen uıymdastyrylǵan sarapshylar alańynda saıası partııalar úshin eń basty nárse ıdeologııa ekenin atap ótti.
– Saıası partııalardyń ıdeologııalyq negizi óte mańyzdy. Saıasattaný ǵylymynda ıdeologııalyq ólshemdi anyqtaǵanda, dástúrli túrde úsh uǵym qoldanylady: ortalyq partııalar, ońshyl partııalar jáne solshyl partııalar. Qazaqstanda saıası partııalarǵa «ońshyl» ne «solshyl» dep naqty baǵa berý qıyn. Sebebi bizde taza solshyl ne taza ońshyl partııalar joq. Olardy ustanymdaryna baılanysty ortasha solshyl nemese ortasha ońshyl ortalyq partııalar dep ataýǵa bolady. Elimizdegi partııalardyń baǵdarlamalaryn saralasaq, barlyǵy uqsas ekenin baıqaımyz. Bári de ortaq ındıkatorlarǵa negizdelgen. Mysaly, barlyǵy áleýmettik jaǵdaıdy jaqsartyp, ekonomıkany ary qaraı damytqysy keledi jáne adamı kapıtalǵa nazar aýdarady. Jalpyǵa ortaq ustanymdar saıası partııalarda áli kúnge deıin bar. Olar ıdelogııalyq negizin, ustanymdaryn qurastyrmaıynsha, dástúrli, turaqty elektoratyn da qalyptastyra almaıdy, – dedi ol.
Sonymen qatar saıasattanýshynyń sózinshe, qazaqstandyq qoǵam birtutas emes, segmenttelgen. Daýys berýshilerdiń arasynda qoǵamnyń ártúrli taby men tobynan shyqqan ókilder bar. Sondyqtan partııalar ár aımaqqa, ár býynǵa, t.b. qoǵam ókilderine usynystaryn daıyndaýy qajet.
Aıta keteıik, buǵan deıin saıasattanýshy saıası partııalar popýlızmge salynbaýy kerektigin aıtqan edi.
