Saıası partııalar qatarynda jastar sanynyń artýynan utylmaımyz - jastar qoǵalysynyń kóshbasshysy

NUR-SULTAN. QazAqparat - «Team Qazaqstan» jastar qozǵalysynyń kóshbasshysy Ashat Sadyrbaı Memleket basshysy Qasym-Jomart Toqaev qol qoıǵan «Saıası partııalar týraly» Qazaqstan Respýblıkasynyń Zańyna ózgeris pen tolyqtyrýlar engizý týraly» QR Zańyna oraı pikir bildirdi, dep habarlaıdy QazAqparat tilshisi.

«Menińshe, saıası partııalar qataryndaǵy jastar sanynyń artýynan utpasaq utylmaıtynymyz anyq. Kerisinshe jastardy qoǵamdyq-saıası protsesterge barynsha tartýymyz qajet-aq. Olardyń sanyn saıasatta ǵana emes, sonymen birge qoǵamymyzdyń tynys-tirshiliginiń ózge de salalarynda arttyra túsý qajet der edim», - dedi ol.

Onyń atap ótýinshe, bul zań jobalarynyń barlyǵy da Qazaqstan Prezıdenti Qasym-Jomart Toqaevtyń bastamasymen ázirlenip otyr jáne olar Ulttyq qoǵamdyq senim keńesiniń otyrysynda jan-jaqty qaralaǵan. Bul qujattar qoǵam suranysyna tolyqtaı jaýap bere alatyn saıası reformalardyń bóligi sanalady.

«Tolyqtaı alǵanda, qabyldanǵan zańdardyń qoǵamymyz úshin, memleketimiz úshin ómirlik máni óte zor», - dedi Ashat Sadyrbaı.

Buǵan deıin Memleket basshysy «Qazaqstan Respýblıkasynda beıbit jınalystardy uıymdastyrý jáne ótkizý tártibi týraly» Qazaqstan Respýblıkasynyń Zańyna qol qoıǵanyn habarlaǵan edik.