Saıası partııalar ashyq ári jarııa básekege kóshe bastaǵan - sarapshy
ASTANA. KAZINFORM – Qazirgi elektoraldyq naýqannyń bastalýy saıası partııalardyń neǵurlym ashyq ári jarııa básekege kóshe bastaǵanyn kórsetedi, munda dástúrli úgit-nasıhatpen qatar mazmundy saıası pikirtalastardyń róli kúnnen-kúnge artyp keledi. Bul týraly «SAILAÝ-2026: medıa jáne tsıfrlyq platformalar» sarapshylar alańynda saıasattanýshy Talǵat Qalıev málimdedi.
Sarapshynyń aıtýynsha, aldyńǵy naýqandardan ózgeshe, búginde nazar tek óńirlerdegi saılaýshylarmen jáne tsıfrlyq BAQ-pen jumysqa ǵana emes, saılaý protsesine qatysýshylar arasyndaǵy ashyq pikirtalasqa da aýysyp otyr. Úgit-nasıhattyń alǵashqy kúnderiniń ózinde saıası kúshter arasynda jarııa talqylaý órbip, onyń ortalyǵynda parlamenttik qyzmettiń tıimdiligi, kásipkerlik qoǵamdastyq múddesin bildirý jáne bıznestiń saıasattaǵy róli máseleleri turdy.
Talǵat Qalıev atap ótkendeı, mundaı pikirtalastar elektoraldyq protsestiń básekelestiginiń artyp kele jatqanyn jáne partııalardyń óz baǵdarlamalaryn usynýmen qatar, qoǵam damýynyń ózekti máseleleri boıynsha óz ustanymdaryn jarııa túrde qorǵaýǵa daıyn ekenin kórsetedi.
Sondaı-aq sarapshy partııalyq landshafttyń jańarýyna nazar aýdardy. Onyń aıtýynsha, birqatar saıası partııalarda basshylyq aýysty: kóp jyldan beri jetekshilik etken tulǵalar óz ókilettikterin jańa býyn ókilderine berdi.
-Jańa basshylar partııalyq júıege zamanaýı syn-qaterlerge saı jańa ıdeıalar men tásilder alyp kelýi, sondaı-aq jańa jaqtastardy tartýǵa jáne saıası básekeniń odan ári damýyna yqpal etýi tıis, – dep atap ótti saıasattanýshy.
Qazaqstan Respýblıkasynyń Prezıdenti janyndaǵy Qazaqstannyń strategııalyq zertteýler ınstıtýty uıymdastyrǵan sarapshylar alańy saıası kommýnıkatsııanyń tsıfrlyq dáýirdegi transformatsııasyna, saılaý aldy úgit-nasıhatta jasandy ıntellektti qoldanýǵa, dezaqparatqa qarsy is-qımylǵa, sondaı-aq elektoraldyq minez-qulyqtyń zamanaýı úrdisteri men qoǵamnyń saıası partııalardan kútetin úmitterine arnaldy.
Osyǵan deıin saılaý naýqanynda partııalar arasyndaǵy pikirtalas kúsheıgeni týraly jazdyq.
