Saıası partııa ókilderiniń komandalyq teledebaty qalaı ótti

Teledebattyń basty ereksheligi – pikirtalas komandalyq formatta ótti, ıaǵnı ár partııadan eki spıkerden qatysty. Partııalar saıası ustanymyn, syndarǵa qarsy ýájin komandalyq formatta jetkize bildi.

Joba eń aldymen jerebe tartý rásiminen bastaldy. Bir kún buryn Jibek Joly telearnasynyń tikeleı efırinde partııa ókilderiniń sóz sóıleý reti anyqtalǵan bolatyn. Jerebege sáıkes partııalardyń sóıleý reti tómendegideı órbidi:

1. «Aq jol» partııasy (Bek-Muhamed Jáýkebaev, Ermek Ábildın);

2. Jalpyulttyq sotsıal-demokratııalyq partııasy (Larısa Lı, Nuraınash Kamalova);

3. «Ádilet» partııasy (Aıjan Aımaǵanova, Mádı Myrzaǵaraev);

4. Qazaqstannyń Halyq partııasy (Jandos Bıdaıbekov, Irına Smırnova);

5. «Aýyl» partııasy (Jazıra Sultanqulova, Erbolat Saýryqov);

6. «Baıtaq» partııasy (Amalbek Ómirtaı, Almat Turtaev);

7. Respublica partııasy (Oljas Quspekov, Dınara Shúkijanova).

Osylaısha, 4 raýndtan turatyn teledebatta partııalar osy rettilik boıynsha sóz aldy.

Aıta keterligi, komandalyq teledebatta reglamenttiń saqtalýy qatań baqylandy.

Mysaly, birinshi kezeńde ár partııa ókilderi óz ustanymyn ǵana emes, básekelesteriniń baǵdarlamasyna da synı kózqarasyn bildirýge múmkindik aldy. Ol úshin pikirsaıysshylarǵa 2 mınýt 30 sekýndtan ýaqyt berildi. Partııalar bul ýaqytty ustanymdaryn qazaq jáne orys tilinde qatar jetkizýge jumsady.

Ekinshi kezeńde kórermen men jýrnalıster spıkerlerge suraq qoıdy. Saýaldyń bári «Zań men tártip – Ádiletti Qazaqstannyń negizi» taqyrybymen baılanystyrylǵan. Bul raýndta ár partııa ókiline 2 suraqtan qoıylyp, 1 jarym mınýt ýaqyt berildi.

Úshinshi raýndta ár partııa óz tańdaýy boıynsha ózge partııaǵa suraq qoıyp, ózara pikirtalas uıymdastyrdy. Saıası partııalarǵa jaýap berýge 2 mınýt ýaqyt berildi ári jaýaptan soń suraq qoıýshy tarapqa qarsy pikir bildirýge 30 sekýnd qosyldy.

Sońǵy «Ýáde» dep atalatyn kezeńde árbir partııa ókili Quryltaıǵa saılanǵan jaǵdaıda atqarylatyn istiń anyq-qanyǵyn baıandady. Belgilengen 2 mınýt ishinde saıası uıymdardyń aldaǵy jospary, bes jylǵa josparlanǵan mindetter tarqatyldy.

Sonymen qatar Qazaqstan qoǵamdyq damý ınstıtýty «Jibek Joly» telearnasynda ótken komandalyq teledebatta saýalnama júrgizgen-di. Tikeleı efırde kórermenge «Qaı partııa komandasynyń sózi ótimdi?» degen saýal qoıylǵan. Kórermender ekrannyń tómengi bóligindegi QR-kod arqyly daýys berip, 2 saǵatqa jýyq aralyqta 165 153 adam tańdaý jasady.

Onlaın daýys berý nátıjesi:

• «Ádilet» partııasy – 60,6%;
• «Aýyl» partııasy – 15,1%;
• Respublica partııasy – 10,2%;
• JSDP – 3,9%;
• «Aq jol» partııasy – 3,5%;
• Qazaqstan Halyq partııasy – 3,3%;
• «Baıtaq» partııasy – 2,7%;
• «Eshqaısysyn qoldamaımyn» – 0,7%.

Eskeretin jaıt, bul saýalnama saılaýǵa qatysýshy partııanyń reıtıngin anyqtaýǵa arnalmaǵan. Tek teledebatqa qatysyp jatqan partııa ókiliniń jaýaby men belsendiligine kórermen tarapynan berilgen derbes baǵa retinde.

Saıası partııalardyń ókilderi osymen úshinshi iri alańda pikirtalasqa shyǵyp otyr. Buǵan deıin saıası dıalog eki respýblıkalyq telearnada uıymdastyrylǵan bolatyn.

Eske salsaq, bıyl 1 shildede Memleket basshysy «Qazaqstan Respýblıkasy Quryltaıynyń saılaýyn taǵaıyndaý týraly» Jarlyqqa qol qoıdy. Saılaý 23 tamyzda ótedi.

QR Ortalyq saılaý komıssııasy Quryltaı saılaýyna qatysatyn 7 saıası partııanyń barlyǵynyń partııalyq tizimderin tirkedi. 145 depýtattyq mandatqa 545 kandıdat úmitker bolyp otyr.