Saıası mádenıetti nyǵaıtýda da zııaly qaýymnyń róli asa mańyzdy – Máýlen Áshimbaev

NUR-SULTAN. QazAqparat – Saıası mádenıetti nyǵaıtýda da zııaly qaýymnyń róli asa mańyzdy. Bul týraly búgin elimizdiń qoǵam ókilderimen kezdesken Senat Tóraǵasy Máýlen Áshimbaev aıtty, dep habarlaıdy QazAqparat tilshisi.

«Sonymen qatar, úlken saıası ózgerister sanadaǵy ózgeristerdi talap etedi. Joldaý saıası lıberalızatsııa úrdisin tezdetedi. Saıası báseke, polemıka, pikir alýandyǵy aldaǵy ýaqytta arta túsetini anyq. Bul daýryqpa daýdy emes, konstrýktıvti dıalogty kúsheıtýge tıis. Lıberalızatsııa úrdisi qarqyn alǵan saıyn qoǵamda mámilege kelý mádenıeti men jaýapkershilikti arttyrý qajet», - dedi ol.

Senat Tóraǵasynyń aıtýynsha, osyndaı saıası mádenıetti nyǵaıtýda da zııaly qaýymnyń róli asa mańyzdy.

«Prezıdentimiz keshe sóziniń aıaǵynda «Jańa Qazaqstan – jańarý men jańǵyrý joly, búgingi býynnyń bolashaq urpaqqa amanaty» dedi. Qasym-Jomart Kemeluly Jańa Qazaqstandy birge órkendetýge shaqyrdy. Sol sebepti alda barshamyzdy aýqymdy jumys kútip tur. Búgin solardy aqyldasaıyq. Oılaryńyzdy ortaǵa salyńyzdar. Aıtylǵan pikirler Parlamenttiń jumysynda eskeriletin bolady»,- dep túıindedi sózin Máýlen Áshimbaev.