Saıası-qýǵyn súrginnen zardap shekken on myńdaǵan adam Jambyl jerinen pana tapty - Kókirekbaev

TARAZ. QazAqparat -  Jambyl oblysynda saıası qýǵyn-súrgin qurbandaryn eske alý kúnine arnalǵan mıtıng ótti, dep habarlady óńir ákiminiń baspasóz qyzmetine silteme jasap «QazAqparat» HAA tilshisi.

 Saıası qýǵyn-súrginnen zardap shekkender monýmenti mańyndaǵy mıtıngke  oblys jáne qala basshylary, qoǵamdyq birlestikter ókilderi, soǵys jáne eńbek ardagerleri, qala jastary men qonaqtary qatysty. Olar monýmentke gúl shoqtaryn qoıyp,  totalıtarlyq rejim qurbandaryn bir mınýt únsizdikpen eske aldy.

Mıtıngti ashqan oblys ákimi Kárim Kókirekbaev saıası qýǵyn-súrgin qurbandaryn eske alý kúni 20-shy ret ótkizilip otyrǵanyn atap ótti. «GÝLAG abaqtysynda qaza tapqan, basqa kózqaraspen jazyqsyz sottalǵandar, týǵan jerinen aıaýsyz qýylǵandar - túrli etnıkalyq jáne din tobynan mıllıondaǵan jandardy eske alý - biz úshin, táýelsiz Qazaqstan azamattary úshin olarǵa degen máńgi qurmet dep túsinemin.

Jer aýdarylǵan on  myńdaǵan ult ókilderi - nemis, polıak, koreı, Soltústik Kavkaz  jáne t.b. halyqtardyń bizdiń ólke jylnamasynda erekshe orny bar.   Barlyq qıyndyqqa qaramastan, jambyldyqtardyń qonaqjaılylyqtarynyń  arqasynda olar jańa ómir bastady. Saıası qýǵyn-súrginde zardap shekkender máńgi jadymyzda saqtalady», - dedi oblys ákimi Kárim Kókirekbaev.