Saıası qýǵyn-súrgin jáne aqtaý protsesine qatysty ǵylymı baǵdarlama ázirlendi
«Keshe memlekettik komıssııanyń 2-otyrysy ótti. Kún tártibinde júrgen biraz másele talqylandy. Onyń ishinde aımaqtaǵy komıssııalardyń jumysyna qatysty máseleler pysyqtaldy. Memlekettik komıssııa qyzmetin qamtamasyz etý maqsatynda «Qazaqstanda 20-ǵasyrdyń 20-50 jyldaryndaǵy jappaı saıası qýǵyn-súrgin jáne aqtaý protsesi» biryńǵaı derekter bazasyn qalyptastyrý taqyrybynda arnaıy ǵylymı baǵdarlama ázirlendi. Ol baǵdarlama daıyn. Qarjy máselesi tolyqtaı sheshildi. Komıssııanyń búkil jumysy, zertteýshilerimizdiń bári osy ǵylymı baǵdarlama negizinde ary qaraı jumys isteıdi. Baǵdarlamany kelesi aptada joǵary ǵylymı-tehnıkalyq keńestiń otyrysynda da qarastyratyn bolamyz. Keńes qorytyndysy boıynsha baǵdarlamaǵa qatysty kún tártibindegi máseleler bolsa, onda qosymsha qabyldaımyz», - dedi Eraly Toǵjanov Ortalyq kommýnıkatsııalar qyzmetindegi baspasóz máslıhatynda.
Onyń atap ótýinshe, memlekettik komıssııanyń jumys baǵyttary boıynsha 11 jumys toby quryldy. Bul toptardyń jumysyna elimizdegi jetekshi ǵylymı-zertteý ınstıtýttarynyń, JOO-lardyń 57 ǵylymı qyzmetkeri jumyldyryldy.
«Barlyq memlekettik organdarmen komıssııanyń jumys toptarynyń birlesken jumysyn qamtamasyz etý maqsatynda arnaýly jobalyq keńse qurylyp, qyzmetin bastap ketti. Keńse quramynda 11 memlekettik organnyń ókilderi, 6 ǵalym bar. Olar jumysyn istep jatyr. Barlyq óńirde ákimderdiń orynbasarlary basqaratyn arnaýly óńirlik komıssııalar quryldy. Olardyń da quramyna jergilikti ǵalymdar, qoǵam ókilderi, máslıhat depýtattary kiredi. Jergilik komıssııalar aımaqtyq muraǵattarǵa qatysty jumystardy atqarady», - dedi Úkimet basshysynyń orynbasary.
