Saıası qýǵyn-súrgin týraly jas ǵalymdardyń eńbekterin jarııalaýǵa kómektesemiz – Aıda Balaeva

NUR-SULTAN. QazAqparat – QR Aqparat jáne qoǵamdyq damý mınıstri Aıda Balaeva Saıası qýǵyn-súrgin qurbandaryn tolyq aqtaý jónindegi memlekettik komıssııaǵa kómek retinde mınıstrlik saıtynda ǵalymdardyń materıalyn jarııalaıtyn paraqsha ashýdy usyndy, dep habarlaıdy QazAqparat.

«Jas ǵalymdardyń komıssııa jumysyna qosylý jáne qatysý múmkindigin qarastyrý qajet dep sanaımyn, óıtkeni bul jas tarıhshylardyń ǵylymı izdenisteri úshin jaǵdaı jasaýǵa yqpal etedi. Arhıvterdiń qoljetimdi bolýy da – taptyrmas múmkindik. Óńirlerde de biregeı jumystar júrgizilip jatyr, óıtkeni bul jas ǵalymdardyń jumysyn óńirlik deńgeıde uıymdastyrýǵa kómektesedi. Munyń bárin bir alańǵa negizdeý kerektigi túsinikti. Komıssııaǵa kómek retinde bizdiń saıtymyzda ǵalymdardyń materıaldaryn, ǵylymı maqalalaryn jarııalaı alatyn jeke paraqsha qurýdy usynamyn. Osylaısha biz olardy bólek júıeleı alamyz», - dedi A. Balaeva «ALJIR» kesheninde jas ǵalymdarmen kezdesýde.

Onyń aıtýynsha, bul jumysqa barsha qoǵamdy tartý qajet.

«Jekelegen jumys toptary jumys isteıtini túsinikti. Munda búkil qoǵamdy baılanystyrý mańyzdy. Óıtkeni, árbir qazaqstandyq otbasynyń óz tarıhy bar, árbir adam muraǵatty jeke esteliktermen tolyqtyra alady jáne olarǵa ashyq túrde qoljetimdi etýge bolady. Sondyqtan Aqparat jáne qoǵamdyq damý mınıstrligi retinde jas ǵalymdarǵa óz áleýetin keńinen paıdalanýǵa, tıisinshe halyqaralyq áriptesteriniń nazaryn aýdarýǵa múmkindik berý úshin jeke aqparattyq alańdar, aıdarlar, baǵdarlamalar qurýǵa daıynbyz», - dedi mınıstr.

Mınıstr bul máselede halyqaralyq deńgeıde ózara is-qımyl qurý mańyzdy ekenin atap ótti.

«Máselen, «ALJIR» biregeı keshenine jyl saıyn kóptegen elderdiń elshilikteri keledi. Árbir el munda analary, ájeleri jerlengenin kórsetkisi keledi. Beınejazba túsiredi, gúl shoǵyn qoıady. Bul jas ǵalymdardy basqa elderde turatyn áriptesterimen baılanysýǵa yntalandyrady. Halyqaralyq deńgeıde ózara is-qımyl jasaý óte mańyzdy, óıtkeni bul komıssııanyń tıimdi jumys isteýine yqpal etedi, osyndaı qaıǵyly oqıǵalarǵa tap bolǵan elderdi jobaǵa tartýǵa múmkindik beredi», - dedi Aıda Balaeva.