Saıası qýǵyn-súrgin men asharshylyqtyń sebebin urpaqqa uǵynyqty jetkize bilýimiz kerek
ASTANA. QazAqparat - Asharshylyq zulmatynyń túp-tórkinin jas urpaqqa keńinen túsindirý kerek. Bul týraly búgin Astanada «HH ǵasyrdyń 30 jyldaryndaǵy Qazaqstandaǵy saıası qýǵyn-súrgin jáne asharshylyq» taqyrybyndaǵy ǵylymı-tájirıbelik konferentsııada Astana qalasy Іshki saıasat basqarmasynyń basshysy Bolat Tilepov málim etti.
«Ótken ǵasyr qazaq halqy úshin óte aýyr tıdi. Ásirese, ǵasyrdyń basyndaǵy eki úlken zulmatty tarıhı turǵyda zerttep, urpaqtarymyzdyń aldynda bul náýbet jaıynda maǵlumat berý úshin osyndaı konferentsııalardyń orny erekshe. Osy oraıda bundaı zulmattyń qaıtalanýyna jol bermes úshin, onyń túp-tórkinin, sebebin uǵynyqty jetkize bilýimiz kerek», - dedi B. Tilepov.
Osy eki zulmattyń saldarynan mıllıondaǵan adamdar qurban bolǵanyna toqtalǵan ol, «asharshylyq shyn máninde tabıǵattyń qalaýynan emes, sol kezdegi solaqaı saıasattyń jalaýymen bolǵan oqıǵalar. Sondyqtan osynyń barlyǵynyń atyn atap, túsin tústep ǵylymı turǵyda kóterip, tarıhı baǵasyn berý maqsatyn qoıyp otyrmyz», - dedi.
Resmı málimetter boıynsha, zulmat jyldary Qazaqstanda 103 myń adam qýǵyn-súrginge ushyraǵan jáne 25 myń adam atý jazasyna kesilgen. Ǵalymdardyń málimetinshe, ashtyqtan Qazaqstan dalasynda kóz jumǵandardyń sany ǵana 3,1 mln. adamnan asyp ketedi.
Aıta keteıik, 2014 jylǵy 31 mamyr - Saıası qýǵyn-súrgin jáne asharshylyq qurbandaryn eske alý kúnine oraı Astanada birqatar qoǵamdyq-saıası sharalar ótkizý josparlanyp otyr. Osy kúni saǵat 11.00-de Saıası qýǵyn-súrgin jáne totalıtarızm qurbandarynyń «ALJIR» murajaı-memorıaldy kesheninde «Eske alý qabyrǵasyna» gúl qoıý rásimi jáne eske alý mıtıngisi ótedi. Sonymen qatar, erteń saǵat 15.00-de «1932-1933 jyldardaǵy asharshylyq qurbandaryna taǵzym» Monýmentine (Abaı jáne Respýblıka dańǵyldarynyń qıylysy) gúl qoıý rásimi ótedi.
