Saıası qýǵyn-súrgin qurbandaryn aqtaý: Qaraǵandyda óńirlik komıssııanyń 1-otyrysy ótti

QARAǴANDY. QazAqparat – Qaraǵandy oblysynda saıası qýǵyn-súrgin qurbandaryn aqtaý máseleleri jónindegi óńirlik komıssııa quryldy. Oǵan kimder engeni jáne tarıhı ádilettilikti qalpyna keltirý úshin qandaı bastamalar usynylǵany týraly birinshi otyrysta belgili boldy. Jınalys Zoom platformasynda onlaın uıymdastyryldy, dep habarlaıdy QazAqparat tlshisi.

«El Prezıdentiniń tapsyrmasy boıynsha saıası qýǵyn-súrgin qurbandaryn tolyq aqtaý jónindegi memlekettik komıssııa quryldy. Osyndaı komıssııalar óńirlerde qurylǵan. Bul konsýltatıvtik-keńesshi organ. Búgin biz is-qımyl josparyn talqylaımyz. Bizdiń oblys aýmaǵynda GÝLAG júıesiniń eńbekpen túzetýge arnalǵan birneshe lager, sonyń ishinde eń irisi Karlag ornalasqan. Biz jazyqsyz qýǵyn-súrginge ushyraǵandar týraly estelikterge qurmet bildirýimiz kerek. Sol jyldary kóptegen halyqtar, sonyń ishinde qazaqtar da zııaly qaýymnyń basym bóliginen aıyryldy. Bolashaq úshin este saqtaý jáne tarıhı ádilettilikti qalpyna keltirý – bizdiń azamattyq paryzymyz», - dedi oblys ákiminiń orynbasary Abzal Núkenov.

Óńirlik komıssııaǵa 28 adam – memlekettik jáne quqyq qorǵaý organdarynyń ókilderi, qoǵam qaıratkerleri men ǵalymdar kirdi. Tóraǵa bolyp Abzal Núkenov taǵaıyndaldy. Onyń orynbasary Karlag tarıhyn zertteýmen kóp jyldan beri aınalysyp kele jatqan akademık E.A. Bóketov atyndaǵy Qaraǵandy ýnıversıtetiniń rektory Nurlan Dýlatbekov boldy.

Komıssııa músheleri arasynda tarıhshy, «Tulǵataný» ǵylymı-zertteý ortalyǵynyń dırektory Nursahan Beısenbekova, «Alash» partııasynyń negizin qalaýshylardyń biri, qazaq qaıratkeri Álimhan Ermekovtiń nemeresi Oleg Ermekov, etnobirlestikterdiń basshylary, oblystyq QHA músheleri Ývaıs Djanaev, Vılen Molotov-Lýchanskıı, Vıtalıı Tvarıonas, tanymal bıznesmen Erlan Áshim bar.

«Komıssııanyń mindeti saıası qýǵyn-súrgin qurbandaryn tolyq ońaltý ǵana emes, tarıhty baǵalaý, materıaldardy jınaý jáne taldaý. Ýnıversıtette biz Qazaqstandaǵy asharshylyq týraly zertteý jobasyn bastadyq. Oǵan ǵalymdar men stýdentter qatysady.

Qaraǵandy oblysynda qýǵyn-súrginge ushyraǵandardy jappaı jerleý kartasyn jasaý kózdelip otyr. Otyrysta arhıvterdi tolyq qupııasyzdandyrý qajettiligi týraly aıtyldy», - dep atap ótti Nurlan Dýlatbekov.

Aqtalýy tıis adamdardyń naqty sany belgisiz. Oblystyq prokýratýranyń málimetinshe, 2019-2020 jyldary 311 ótinish túsken. Jaǵdaılardyń jartysynda ótinish berýshiler saıası qýǵyn-súrgin qurbandary nemese zardap shekkender dep tanyldy.

Esterińizge sala keteıik, 2020 jylǵy 24 qarashada Memleket basshysy Qasym-Jomart Toqaev «Saıası qýǵyn-súrgin qurbandaryn tolyq ońaltý jónindegi memlekettik komıssııa týraly» Jarlyqqa qol qoıdy.