311 myń adam aqtalǵan: Saıası qýǵyn-súrgin qurbandaryn aqtaıtyn memkomıssııa jumysyn aıaqtady
Memlekettik keńesshi Erlan Qarınniń tóraǵalyǵymen Saıası qýǵyn-súrgin qurbandaryn tolyq aqtaý jónindegi memlekettik komıssııasynyń sońǵy otyrysy ótti, dep habarlaıdy Kazinform Aqordaǵa silteme jasap.
Basqosýda Memlekettik komıssııanyń jáne onyń aımaqtyq bólimsheleriniń jumysy qorytyndylandy.
Otyrysqa qatysýshylar Memleket basshysynyń 2020 jylǵy 24 qarashadaǵy Jarlyǵyna sáıkes qurylǵan komıssııa HH ǵasyrdyń 20-50 jyldaryndaǵy saıası qýǵyn-súrgin qurbandaryn aqtaý úshin keshendi ári júıeli jumys júrgizýge múmkindik bergenin atap ótti.
Komıssııa, eń aldymen, zertteý-izdeý jáne jınaqtaý-taldaý jumystaryna basa mán berdi.
Onyń qyzmetin úılestirý úshin Jobalyq keńse qurylyp, quramyna ǵalymdar, zertteýshiler jáne memlekettik organdardyń ókilderi kirdi.
Túrli sanattaǵy saıası qýǵyn-súrgin qurbandaryn qamtý úshin naqty taqyryptar boıynsha bólingen úsh ǵylymı top jasaqtaldy.
Ár óńirde aımaqtyq komıssııa quryldy.
Memlekettik komıssııa quramynda 425 ǵalym men zertteýshi, onyń ishinde 260-tan asa maman aımaqtyq komıssııada eńbek etti.
Olar elimizdiń túkpir-túkpirindegi 60-tan astam memlekettik jáne vedomstvolyq arhıvte aýqymdy jumys atqardy.
Qazirdiń ózinde 2,6 mıllıonnan astam qujat pen materıaldan qupııa belgisi alynyp tastaldy.
Memlekettik komıssııa saıası qýǵyn-súrginge ushyraǵan 311 myńnan astam adamdy aqtaý úshin qoldanystaǵy zańnama aıasynda naqty jumys júrgizdi.
Zertteý nátıjesin ǵylymı turǵyda rásimdeý úshin memlekettik komıssııa materıaldarynyń 72 tomnan turatyn jınaǵy bir serııamen ázirlendi.
Saıası qýǵyn-súrginge qatysty zertteý jumysyn Prezıdent tapsyrmasymen qurylǵan XX ǵasyrdaǵy saıası qýǵyn-súrgin materıaldaryn zerdeleý ortalyǵy ary qaraı jalǵastyrady.
Arnaýly memlekettik arhıvterden 2 jyl ishinde osy ortalyqqa repressııa qurbandaryna qatysty 688 myńnan astam is jáne 48 myńǵa jýyq esepke alý kartochkasy berildi.
Ortalyq HH ǵasyrdyń 20-50 jyldaryndaǵy saıası qýǵyn-súrgin týraly qujattardy tsıfrly formatqa kóshirip, elektrondy qor qalyptastyrady.
Onyń bári ǵalymdarǵa, zertteýshilerge jáne qalyń kópshilikke qoljetimdi bolady.
Otyrystyń sońynda memlekettik komıssııa músheleri, ǵalymdar, zertteýshiler, sarapshylar Komıssııa jumysyna jáne ǵylymı-zertteý qyzmetin júrgizýge memleket tarapynan árdaıym qoldaý kórsetilgeni úshin Prezıdentke rızashylyq bildirdi.
