Saıası qýǵyn-súrgin qurbandaryn qurmetteý tiriler úshin kerek – depýtat
ASTANA. KAZINFORM – QR Ulttyq mýzeıinde saıası qýǵyn-súrgin qurbandaryn eske alý kúnine oraı Alash arystary men qaıratkerleriniń qundy zattary qoıylǵan kórme uıymdastyryldy.
QR Mádenıet jáne aqparat mınıstrliginiń qoldaýymen ótken keshte Ulttyq mýzeı ujymymen qatar, S.Seıfýllın mýzeıi jáne Aljır memorıaldy-murajaı kesheninde saqtalǵan jádigerler de qoıyldy.
2020 jyly 24 qarashada Memleket basshysynyń Jarlyǵymen Saıası qýǵyn-súrgin qurbandaryn tolyq aqtaý jónindegi memlekettik komıssııa qurylǵany belgili. 2023 jyldyń sońynda komıssııa jumysy qorytyndylandy. Qoldanystaǵy zańnyń negizinde 300 myńnan astam adam aqtaldy. Saıası qýǵyn-súrgin qurbandaryn tolyq aqtaý jónindegi komıssııanyń uıymdastyrýymen 70 tomnan asa jınaq shyqty. Al keıbir jerlerde bul baǵyt ár oblys boıynsha taǵy da tolyǵady. Onyń bárin eseptegende jınaq sany 100 tomnan asady degen boljam bar.
Kórmede sóz alǵan Májilis depýtaty Janarbek Áshimjan qoǵamda tek 31 mamyr kúni ǵana emes jyl boıy saıası qýǵyn-súrgin qurbandary týraly dúnıeler aıtylýǵa tıis ekenin jetkizdi. Bul – tarıhqa degen taǵzym.
«Saıası qýǵyn-súrgin qurbandaryna tek 31 mamyr kúni ǵana emes, ár kún, ár apta, ár aı saıyn qurmet kórsetip, ulyqtap, urpaqqa úlgi etip otyrǵan abzal. Bul tiriler úshin kerek. Ulttyq mýzeıdegi oımaqtaı ǵana kórmege qoıylǵan uly tulǵalar tutynǵan buıymdar, kıimder kóp oıǵa jeteleıdi», - dedi depýtat.
Ulttyq mýzeı dırektorynyń orynbasary Aqmaral Ibraevanyń aıtýynsha, kórmede bıyl mereıtoıy atalyp ótiletin tarıhı tulǵalarǵa qatysty dúnıeler qamtylǵan.
«Kórmede Sanjar Asfendııaruly, Oraz Jandosov, Mirjaqyp Dýlatov, Júsipbek Aımaýytov, Sáken Seıfýllın, Beıimbet Maılın, Іlııas Jansúgiruly, Sultanbek Qojanov, Turar Rysqulov sııaqty uly tulǵalarǵa qatysty fotosýretter, arhıvtik qujattar, kitaptar jáne jeke zattar qoıylǵan. Olardyń arasynda M.Dýlatovtyń taıjaqysy, І.Jansúgirulynyń kúndeligi, ALJIR lagerinde tutqynda bolǵan ult zııalylarynyń áıelderiniń qoldanǵan zattary bar», - dedi ol.
Foto: Vıktor Fedıýnın/Kazinform
