Saıası kóshbasshylyq ózara túsinistik pen qurmetten turady — Qasym-Jomart Toqaev
NЬıÝ-IORK. KAZINFORM — Prezıdent Qasym-Jomart Toqaev BUU Bas Assambleıasynyń 80-shi sessııasy aıasyndaǵy Jalpy debatta keıbir saıasatkerdiń jaýapkershilikten jurdaı málimdemelerin synǵa aldy.
— Qazirgi geosaıası shıeleniske qarap, keıbir saıasatkerler «órkenıetter qaqtyǵysynan qashyp qutyla almaımyz» degen pikir aıtyp júr. Alaıda mundaı alaýyzdyq taǵdyrdyń jazýy emes, olardyń saıası tańdaýy, — dep atap ótti Prezıdent.
Memleket basshysy ǵylym, medıtsına, sport, din jáne mádenıet sııaqty jahandyq ıgilikter geosaıası bólinistiń quralyna aınalmaýǵa jáne sanktsııa salýǵa sebep bolmaý keregin basa aıtty.
— Adamzat ómirindegi bul izgi qundylyqtar bizdi gýmanızm ıdeıasyna biriktiredi. Saıasatkerler jaýapkershilikten jurdaı málimdeme jasaǵanda nemese din men bolmysty saıası upaıyn túgendeý úshin bura tartyp, aǵat áreketke barǵanda senimge selkeý túsip, beıbitshilikke umtylǵan erik-jiger jasıdy. Anyǵynda, saıası kóshbasshylyq — bir-birine kúmán-kúdikpen qarap, menmendik tanytý emes, ózara túsinistik pen qurmetten turady. Álemge tirek bolyp turǵan toleranttylyq pen parasattylyq zań ústemdigine arqa súıeýi qajet, — dedi Qasym-Jomart Toqaev.
Buǵan deıin habarlaǵanymyzdaı, búgin Memleket basshysy BUU Bas Assambleıasynyń mereıtoılyq 80-sessııasynyń Jalpy debattyń ashylýyna qatysyp jatyr. Prezıdent Qasym-Jomart Toqaev TMD elderi basshylarynyń ishinde birinshi bolyp sóz sóıledi. Jıynǵa barlyǵy 97 memleket basshysy qatysyp otyr.
Prezıdent AQSh sapary aıasynda 20-dan astam kezdesý ótkizdi.
Osydan buryn Memleket basshysy Qasym-Jomart Toqaev Gazadaǵy gýmanıtarlyq daǵdarystyń aýqymy keńeıip bara jatqanyna alańdaýshylyq bildirdi.