Saıası básekelestik artty — QSZI basshysy Quryltaı saılaýy týraly
ASTANA. KAZINFORM — Ortalyq saılaý komıssııasynyń aldyn ala qorytyndysy boıynsha, 5 paıyzdyq mejeden bes partııanyń ótýi saıası básekelestiktiń artqanyn kórsetedi. Bul týraly Qazaqstannyń strategııalyq zertteýler ınstıtýty dırektory Jandos Shaımardanov málimdedi.
Ol bul týraly «Saılaý — 2026: qorytyndy jáne jańa saıası beles» atty saraptamalyq alańnyń kýlýarynda aıtty. Mamannyń sózinshe, bir palataly Quryltaı saılaýy jańa Konstıtýtsııanyń is júzinde júzege asyrylýynyń jarqyn mysaly bolyp otyr. OSK-nyń aldyn ala derekterine súıene otyryp, ol ótken saılaý qazaqstandyqtardyń saıası jáne azamattyq belsendiligi joǵary bolǵanyn kórsetkenin atap ótti.
— Saılaýshylardyń 74 paıyzdan astamy daýys berdi. Demek, saılaýshylarymyzdyń tórtten úshine jýyǵy azamattyq belsendilik tanytty. Aldyn ala qorytyndy boıynsha, jeti partııanyń beseýi Quryltaıǵa ótetinin kórip otyrmyz. Bul — óte jaqsy ári qomaqty kórsetkish. Ókildik joǵary bolady. Ótken saılaý barysynda saıası básekelestiktiń artqanyn kórip otyrmyz, — dedi ol.
Sonymen qatar, QSZI basshysy sarapshylar qaýymdastyǵy Quryltaı saılaýyn belsendi ári báseke joǵary saıası naýqan retinde baǵalap otyrǵanyn málimdedi.
— Biz kóptegen teledebatty kórdik. Otandyq arnalardyń efırinde ár apta saıyn televızııalyq debattar ótti. Bul saılaýshylarǵa tek saılaý naýqanyn jáne partııalardyń baǵdarlamalaryn ǵana emes, kandıdattardyń ózin de muqııat baqylaýǵa múmkindik berdi. Óıtkeni, debattarǵa ártúrli úmitkerler qatysty. Jalpy, kandıdattardyń sanynyń ózi, ıaǵnı 145 orynǵa 545 adam talasqany saıası partııalardyń ishinde de, partııalar arasynda da qyzý básekelestik bolǵanyn kórsetedi, — dedi Jandos Shaımardanov.
Aıta keteıik, buǵan deıin Quryltaı depýtattaryn saılaýǵa daýys berýshiler tizimine engizilgen 9 mln 350 myńnan astam saılaýshy daýys bergenin jazǵanbyz.
