«Saıası apatııa» nemese qalalyqtar qaı partııaǵa daýys berýge daıyn?» - respýblıkalyq basylymdarǵa sholý

Keshe Memleket basshysy N.Nazarbaev jumys saparymen Qyzylorda oblysynda bolyp, óńirdiń áleýmettik-ekonomıkalyq tynys-tirshiligimen tanysty. Osyǵan oraı «Aıqyn» gazetiniń juma kúngi nómirinde «Elbasy Syr óńirinde boldy» degen taqyryppen maqala jaryq kórdi. Basylymnyń jazýynsha, sapar sońynda QR Prezıdenti eki kúnnen keıin toılanatyn musylmandardyń ulyq merekesi - Qurban aıt meıramyna oraı Qyzylorda qalasynda boı kótergen jańa Aqmeshit meshitine aıaldap, Quran baǵyshtap barsha qazaqstandyqtardy merekemen quttyqtaǵan.

«Saıası apatııa» nemese qalalyqtar qaı partııaǵa daýys berýge daıyn?» Osy taqyryppen «Aıqyn» basylymynda jaryq kórgen maqalaǵa Saıası sheshimder ınstıtýtynyń qala turǵyndarynyń arasynda júrgizgen áleýmettik zertteýleri arqaý bolǵan. Zertteýdiń qorytyndysyna sáıkes árbir besinshi qazaqstandyq kezekti Parlament saılaýy bolsa, oǵan barǵysy kelmeıtindigin aıtsa, jartysyna jýyǵy qandaı saıası partııaǵa daýys beretindigin áli bilmeıdi eken. Sonymen qatar saýalnamaǵa qatysqan azamattardyń 34 paıyzy «Nur Otan» HDP-ǵa, al «Aq jol» men «Azat» partııalaryna sáıkesinshe 6 jáne 2,9 paıyzy daýys beretindikterin jetkizgen.

 Osy basylymda jaryq kórgen kelesi shaǵyn aqparatta Ońtústik Koreıada ótip jatqan aýyr atletıkadan álem chempıonatynda taǵy bir qazaqstandyq ziltemirshi Maneza Maıa el qorjynyna altyn medal  salǵandyǵy jazylǵan. Shaǵyn aqparat «Maneza Maıa - álem chempıony!» degen taqyryppen berilgen.

 Qazaqstannyń mereıin kótergen Maneza Maıany Elbasy quttyqtady. «Kazahstanskaıa pravda» gazetiniń QR Prezıdentiniń baspasóz qyzmetine silteme jasap habarlaýynsha, qazaqstandyq sportshynyń tamasha jeńisine oraı Memleket basshysy Nursultan Nazarbaev quttyqtaý jedelhatyn  joldaǵan. Onda «Qymbatty Maııa, barlyq qazaqstandyqtardyń jáne óz atymnan seni Ońtústik Koreıadaǵy aýyr atletıkadan álem chempıonatynda altyn medalǵa ıe bolýyńmen  quttyqtaımyn. Bizdiń bárimiz de bul tamasha jeńisti zor qulshynyspen qabyldadyq!  Tabandylyq, joǵary sporttyq sheberlik jáne qajymas qaıratyńdy kórsetip, sen bizdiń elimizdi osy halyqaralyq saıystarda laıyqty kórsete bildiń. Odan ári tabystar men jańa jeńister tileımin!», delingen.

«Kazahstanskaıa pravda» basylymy sondaı-aq Elbasy N. Nazarbaevtyń búgin Belarýs Respýblıkasyna resmı sapary bastalǵanyn da habarlaǵan. 

 Qarashanyń 13-inde QR Prezıdentimen ótken tikeleı jeli barysyndaǵy qazaqstandyqtardyń suraqtaryna jaýaptar buqaralyq aqparat quraldarynda jarııalanyp jatyr. «Aıqyn» gazetiniń búgingi sanynda jer salasyna qatysty túsken saýaldarǵa QR Jer resýrstaryn basqarý agenttiginiń tóraǵasy Ómirzaq Ózbekov jaýap bergen.  «Eldiń árbir azamaty bir ret tegin jer alýǵa quqyly» atty suraq-jaýaptan ózińizdi tolǵandyryp júrgen saýaldarǵa jaýap alasyz.

***

«Azamattyq qoǵamy neǵurlym damyǵan eldiń demokratııasy da soǵurlym belsendi. Bul búginde jıi aıtylyp júrgen jaıt. Áıtse de, qazaq qoǵamynda dala demokratııasy ejelden-aq saltanat qurǵan», dep jazady «Nur Astana» gazeti «Bılik pen qoǵam arasyndaǵy dıalog» atty maqalasynda. Atalǵan jarııalanymǵa qarashanyń 24-25-i aralyǵynda, elordada ótken 5-shi Azamattyq forým barysynda aıtylǵan jaıttar arqaý bolǵan. Maqalada alqaly jıynǵa qatysqan QR Úkimeti basshysynyń jáne Úkimet músheleriniń sóılegen sózderi de keltirilgen.

 Osy alqaly jıynǵa oraı «Astana aqshamy» basylymynyń búgingi nómirinde «Іzgilikti qoǵam izdenisti qalaıdy»  atty  kólemdi maqala jaryq kórgen.

Osy basylymda QR Bilim jáne ǵylym mınıstrligi Kásibı jáne tehnıkalyq bilim berý departamentiniń dırektory Qadyrbek Bóribekovpen aradaǵy suhbat «Innovatsııany kásibı mamandar jasaıdy» degen taqyryppen jarııalanǵan. Ekeýara áńgime barysynda departament dırektory basylymnyń mamandardyń biliktiligi, olardy daıyndaýǵa bólinetin qarjynyń kólemi, kásiptik bilimniń sapasy sııaqty ózekti saýaldarǵa tushymdy jaýap bergen.

***

«Aǵymdaǵy jyl qarjy júıesine ońaı tıgen joq. Degenmen aýyr-jeńil ekenine qaramastan, tıisti esepter júrgizile beretini, sol esepteýler nátıjesinde naqty pikir qalyptasatyny anyq. Tómende Astana qalasy bıýdjeti kiris bóliginiń on aı ishindegi atqarylý barysy týraly az-kem sóz qozǵamaqpyz», dep jazady «Astana aqshamy» basylymy. Gazettiń  qozǵaǵan máselesi tóńiregindegi egjeı-tegjeıli aqparatty «Qarjylyq ahýalymyz qandaı?»  atty maqaladan oqyp-bilýge bolady.

«Astana aqshamy» basylymnyń «Áleýmet saýaly - ákim jaýaby» atty turaqty aıdarynda qala ákimi I.Tasmaǵambetov elorda turǵyndaryn tolǵandyryp júrgen saýaldarǵa tushymdy jaýap bergen.

Osy basylymda Qazaqstannyń halyq jazýshysy, aqyn Farıza Ońǵarsynovaǵa arnalǵan «Farıza Fenomeni» atty kólemdi maqala  jaryq kórdi. «Farıza Ońǵarsynovanyń aqyndyq álemi - adamnyń jan-júreginiń qatpar-qatpar qupııasy ójettese órilgen, kisi bolmysynyń tazalyǵy men taıazdyǵy, áleýeti men álsizdigi, márttigi men mojantopaılyǵy sharǵa salǵandaı sharpysqan, sóıtip jyr joldaryna qorǵasyndaı quıyla qalanyp, tutas bir tarıhı-ádebı dáýirdiń ıdeıalyq-kórkemdik bet-beınesin qaltqysyz tanytqan rýhanı rızyǵymyz», dep jazady basylym.

Elbasynyń Syr óńirine saparyn «Lıter» basylymy da egjeı-tegjeıli jazǵan. Gazet sondaı -aq Memleket Basshysynyń meshitke Quran-kárim tartý etip, búkil qazaqstandyqtardy qasıetti Qurban Aıt merekesimen quttyqtaǵanyn jazady.

Sondaı-aq «qarjy-ekonomıkalyq daǵdarys qaıyrymdylyqqa kedergi emes» degen taqyryppen berilgen maqalada «Lıter» basylymy Almaty ótken TMD-daǵy eń úlken qaıyrymdylyq aktsııasy  - Vena balyna keńinen toqtalady. Gazettiń jazýynsha, bul shoýǵa satylǵan bıletten jınalǵan aqshaǵa balalar úılerine arnalǵan medıtsınalyq jabdyqtar satyp alynbaq.