Saıasattanýshylar men mádenıet qaıratkerleri Prezıdent suhbatyna oraı pikir bildirdi

NUR-SULTAN. QazAqparat – «Habar» respýblıkalyq telearnasyndaǵy «Jeti kún» aptalyq-saraptamalyq baǵdarlamasynda saıasattanýshylar men mádenıet qaıratkerleri Memleket basshysy Qasym-Jomart Toqaevtyń suhbatyna oraı pikir bildirdi, dep habarlaıdy QazAqparat tilshisi.

Aıta keteıik, Prezıdent osy aptada «Qazaqstan» telearnasyndaǵy suhbatta birqatar mańyzdy máselege qatysty naqty jaýap berip, qańtar oqıǵasynan keıin elimizde qalyptasqan jaǵdaıǵa keńinen toqtalyp ótti.

Bul turǵyda Qoldanbaly etnosaıası zertteýler ınstıtýtynyń dırektory Talǵat Qalıev Qazaqstan shekarasyn buzý múmkin emes degen oıyn aıtty. «Óıtkeni barlyq kórshiles eldermen bizdiń shekaramyz halyqaralyq deńgeıde bekitilgen. Osy oraıda elimizdiń tutastyǵy máńgi bolady dep oılaıyn», - dedi ol.

Óz kezeginde Senat depýtat Dana Nurjigit Prezıdent Qasym-Jomart Toqaevtyń aıtyp jatqan reformalary jáı ǵana sóz emes ekenin, naqty mindetterdi iske asyrýǵa baǵyttalǵanyn jetkizdi.

«Reforma degenimiz – júıe qurý. Bul turǵyda «kim ne úshin jaýap beredi», «kim kimnen keıin nege jaýap berýi kerek», ıaǵnı árqaısymyzdyń áreketimiz – fýnktsııamyz anyqtalýy kerek. Óıtkeni barlyǵy aralasyp ketken», - dedi senator.

Al Qazaqstannyń eńbek sińirgen qaıratkeri Jeńis Seıdollauly óner adamdary, mádenıet qaıratkerleri Jańa Qazaqstandy qurýǵa atsalysýy kerek ekenin aıtty. «Sonda ǵana birligimiz bekemdelip, elimiz kórkeıe túsedi. Bul bizdiń óskeleń urpaq aldyndaǵy mindemiz dep oılaımyn», - dedi ánshi.

Sonymen qatar, Qazaqstannyń halyq ártisi Tilektes Meıramov Prezıdent halyqty eńbekqorlyqqa baýlýǵa erekshe ekpin qoıǵanyn atap ótti. Bul turǵyda eńbekqorlyq qasıetin qanymyzǵa sińirip, masyldyq psıhologııadan arylý baǵytynda tıisti jumystardy atqarý mańyzdy.

Aıta keteıik, bıyl 8 aqpanda QR Prezıdenti Úkimet otyrysynda shetelge zańsyz shyǵarylǵan qarjyny qaıtarý jóninde tapsyrma bergen edi.

Osyǵan baılanysty saıasattanýshy Qazbek Maıgeldınov sońǵy málimetter boıynsha 40-tan astam memlekette Qazaqstannyń aqshasy jatqanyn, bul qarajat túrli sektorda ártaraptandyrylǵanyn aıtty.

«Bul rette basqa memleket ekenin, bóten eldiń zańy, basqa eldiń qarjy saıasaty bar ekenin eskerý kerek. Ol jaqtan aqshany shyǵaryp alý úshin áýeli naqty tulǵalardy, naqty mekenin anyqtap alý qajet», - dedi Q. Maıgeldınov.

Munymen qosa saıasattanýshy Aıdar Ámirebaev qazir elimizde «Halyq únine qulaq asatyn memleket» ustanymyna ekpin qoıylyp otyrǵanyn eske saldy.

«Halyqty estıtin memleket birinshi kezekte basshydan bastalýy kerek dep oılaımyn. Sondyqtan telearnada bolǵan suhbatta Memleket basshysy bul jaǵdaıdy tııanaqty kórsetkenin baıqadyq», - dedi A. Ámirebaev.