Saıasattanýshy Prezıdenttiń saıası reformalardy júzege asyrýdaǵy yqpalyn aıtty
«Memleket basshysy Májilistiń jańa quramy depýtattarynyń aldynda sóz sóıledi. Óz sózinde Prezıdent saıası reformalardy júzege asyrý nıetiniń dáıektiligin kórsetti. Saıası partııalar úshin Májiliske ótý shegin 7-den 5% - ǵa deıin tómendetý kóppartııalyqty damytýǵa jáne tutastaı partııalyq júıeni odan ári damytýǵa yqpal etetin bolady. Saıası reformalardyń birinshi paketinde saıası partııalardy tirkeý shegi 50% - ǵa 40 myńnan 20 myńǵa deıin tómendetilgeni esimizde. Sonymen qatar, barlyq deńgeıdegi saılaý bıýlletenderine «barlyǵyna qarsy» baǵanyn engizý qoǵamdy odan ári demokratııalandyrý protsesin, halyqtyń ár túrli pikirlerin eskerý kórsetkishin yntalandyrady. Bul týraly taıaýdaǵy parlamenttik saılaý barysynda ártúrli qoǵam ókilderi men basqa da saıası partııalardyń ókilderi aıtqan bolatyn. Sonyń saldarynan biz is júzinde bılik pen qoǵam arasyndaǵy dıalogtyń nátıjelerin kórip otyrmyz. «Halyq únine qulaq asatyn memleket» qaǵıdasynyń is júzinde júzege asýyna kýá bolýdamyz», - dedi ol.
Saıasattanýshy Parlamentke ótpegen partııalardyń usynystary eskeriletinin aıtty.
Osy saılaýda 7% shekten óte almaǵan partııalar kez kelgen jaǵdaıda aımaqtardaǵy pozıtsııalaryn nyǵaıtady jáne aımaqtyq kún tártibin qurýǵa belsendi qatysady. Búgin Prezıdent olardyń usynystary men ustanymdary esepke alynatynyn aıtty. Ótken saılaýdyń basty artyqshylyǵy aımaqtardaǵy partııalardyń pozıtsııalaryn nyǵaıtý jáne aımaqtyq saıası protsesterdi jandandyrý dep oılaımyn.
Maıgeldınov adam quqyqtary týraly Prezıdenttiń aıtqan basymdylyǵyna qoldaý bildirdi.
«Joǵaryda aıtyp ketken máselelermen qosa alǵanda, búgin Memleket basshysy adam quqyqtaryn qorǵaýǵa baǵyttalǵan saıası reformalardyń kezekti paketin jarııalady. Májilistiń jańa shaqyrylymyna memlekettik saıasatty tıimdi iske asyrýǵa yqpal etetin jańa bastama berildi», - dedi saıasattanýshy.
