Saıasattanýshy merziminen buryn ótetin prezıdent saılaýynyń tarıhı ereksheligin atady

ASTANA. QazAqparat – Saıasattanýshy, qoǵam qaıratkeri Ádil Saılaýbek merziminen buryn ótetin prezıdent saılaýynyń tarıhı ereksheligin atady, dep habarlaıdy QazAqparat tilshisi.

«Memleket basshysy 1 qyrkúıektegi Joldaýynda saılaý bıyl kúzde bolatynyn atap ótken edi. Saıası turǵydan saraptap qarasaq, bul saılaýdyń bolatyny anyq edi. Dál 20 qarashaǵa dóp kelýi prezıdenttik saılaý zańdylyqtarynyń ýaqyt sheńberine baılanysty dep esepteımin. Saıası partııalardyń, basqa da belsendilerdiń saılaýaldy baǵdarlamalaryn pysyqtaýyna, úmitkerlerdi ózara irikteýge bir aı ýaqyt boldy dep túsinse bolady. Endi naqty úmitkerler usynylady. Bul memleketimizdiń turaqty, álemdik shıelenisterge daıyn bolý maqsatynda osyndaı qarqyndy júıe kerek boldy dep oılaımyn», - deıdi saıasattanýshy.

Sarapshy qarashadaǵy saılaý álem qubylyp turǵanda ótetinine de toqtaldy.

«Bul saılaýdyń tarıhı mańyzy jeńimpazy Prezıdent laýazymynda bir márte ǵana otyra alatynynda. Al jeti jyldyq merzim turaqtylyqtyń arqasynda reformany iske asyryp úlgerýge múmkindik beredi»,- dedi Ádil Saılaýbek.

Eske salaıyq, QR Prezıdentiniń kezekten tys saılaýy 20 qarashada ótedi .

Foto: turkystan.kz