Saıasattanýshy men shoýmen til tabysa ala ma - Qazaqstandaǵy taǵaıyndaýlar
«Qazposhta» AQ basqarma tóraǵalyǵyna Sáken Sársenov keldi. Aqparat jáne kommýnıkatsııa mınıstri Dáren Abaev ol týraly óziniń Facebook jelisindegi paraqshasy arqyly habarlady. Abaev jańa basshyny aqparattandyrý jáne telekommýnıkatsııa salasyn damytýǵa úlken úles qosqan maıtalman maman retinde sıpattap, osy ýaqytqa deıin jınaqtaǵan tájirıbesin jańa qyzmette de tıimdi paıdalana alady dep senim bildirdi.
Sáken Seıitjapparuly Máskeý memlekettik avıatsııalyq ınstıtýtyn «Aqparat óńdeý jáne basqarýdyń avtomattandyrylǵan júıesi» mamandyǵy boıynsha támamdaǵan. Ár jyldary Kólik jáne kommýnıkatsııa mınıstrliginde jumys istedi, Qarjy mınıstrligi «Qarjylyq júıelerdi aqparattandyrý ortalyǵy» RMK aqparatty qorǵaýdy uıymdastyrý bóliminiń meńgerýshisi, «Ulttyq aqparattyq tehnologııalar» AQ basqarma tóraǵasynyń orynbasary, «Qazaqtelekom» AQ elektrondyq qyzmetter boıynsha basqarýshy dırektory syndy laýazymdy qyzmetter atqardy.
Sonymen qatar, Bas prokýratýra quqyqtyq statıstıka jáne arnaýly esep jónindegi komıtet tóraǵasynyń orynbasary, Baılanys jáne aqparat vıtse-mınıstri, Kólik jáne kommýnıkatsııa vıtse-mınıstri, Baılanys jáne aqparat agenttigi tóraǵasynyń birinshi orynbasary, Investıtsııalar jáne damý mınıstrliginiń aqparattandyrý jáne aqparat komıtetiniń tóraǵasy bolyp eńbek etti. 2016 jyldyń 21 mamyrynan beri QR Aqparat jáne kommýnıkatsııa vıtse-mınıstri laýazymyn atqaryp keldi.
Al aptanyń ortasynda Dáýren Áskerbekuly «Qazaqstan» RTRK» AQ basshylyǵyna saıasattanýshy Erlan Qarındi taǵaıyndady. «Erlan Tynymbaıuly bilikti saıasattanýshy, ıdeolog, elimizdiń shynaıy patrıoty retinde kópshilikke jaqsy tanys ekenine esh kúmánim joq. Endigi jerde oǵan elimizdegi eń iri medıa qurylymnyń jumysyn odan ári damytý tapsyrylyp otyr. Erlan Tynymbaıuly buǵan deıingi irgeli sharalardy odan ári jalǵastyryp, korporatsııany jańa deńgeıge kóteredi dep senemin», - dep jazdy Abaev óziniń paraqshasynda.
Erlan Tynymbaıuly óziniń eńbek jolyn 1996 jyly Qudaıbergen Jubanov atyndaǵy Aqtóbe memlekettik ýnıversıteti saıasattaný kafedrasynda muǵalim bolyp bastaǵan. Ár jyldary saıası zertteýlerdiń Ortalyq-Azııalyq agenttiginiń dırektory, «Asar» Respýblıkalyq partııasy tóraǵasynyń birinshi orynbasary, Antıterrorıstik baǵdarlamalar ortalyǵynyń basshysy, Mańǵystaý oblysy ákiminiń saıası máseleler jónindegi keńesshisi, QR Prezıdenti Ákimshiliginiń ishki saıasat bóliminiń meńgerýshisi, «Nur Otan» HDP strategııalyq damý jónindegi hatshysy, Qazaqstan strategııalyq zertteýler ınstıtýtyna dırektory bolyp qyzmet atqarǵan.
Týra sol kúni tanymal shoýmen jáne "Túngi stýdııa" baǵdarlamasynyń júrgizýshisi Nurlan Qoıanbaev "Qazaqstan" RTRK bas prodıýseri qyzmetine taǵaıyndalǵany týraly aqparat tarady. Ony kompanııanyń baspasóz qyzmet de rastady. Nurlan Qoıanbaev prodıýser men baǵdarlama júrgizýshisi qyzmetin qatar alyp júretin bolady.
Televıdenıe salasynda bolǵan taǵy bir jańalyq - belgili telejýrnalıst Nurtileý Imanǵalıulynyń qaıta oralýy. «Qazaq jýrnalıstıkasynyń ardager jýrnalısi Nurtileý Imanǵalıuly efırge qaıta oraldy! «Baı- qýatty bolaıyq» Jetisý telearnasynan ər jeksenbi, 19:30-da qarańyz!», - dep jazdy Gúljan Qyzaıbaı óziniń paraqshasynda.
Aqparat mınıstrligine qarasty Ortalyq kommýnıkatsııalar qyzmetine jańa adam keldi. Atalǵan qyzmettiń dırektory Evgenıı Kochetov ujymǵa dırektordyń orynbasary Murat Jumanbaıdy tanystyrdy. Buǵan deıin san alýan memlekettik organdarda resmı ókil bolyp jumys istegen Jumanbaı jańa qyzmette de Ortalyq kommýnıkatsııalar qyzmetiniń resmı ókili qyzmetin qatar atqaratyn boldy.
Budan bólek, ishki ister mınıstri QR Ulttyq ulany «Batys» óńirlik qolbasshysyn aýystyrdy. Atalǵan qyzmetke general-maıor Álibek Serálıev keldi. Lenıngrad ýchılışesin bitirgennen keıin ol qyzmettik jolyn rota komandıriniń tárbıe jáne áleýmettik-quqyqtyq jumystar jónindegi orynbasary bolyp bastaǵan. Oralǵa kelgenge deıin Almaty qalasyndaǵy «Ońtústik» óńirlik qolbasshysy boldy. Al «Batys» óńirlik qolbasshylyǵyn basqarǵan general-maıor Qaırat Aqtanov kerisinshe «Ońtústik» óńirlik qolbasshysy bolyp aýystyryldy.
