Saıasattanýshy qazirgi zamanǵy terrorızmge anyqtama berdi
ASTANA. QazAqparat - Búgin QR Prezıdenti janyndaǵy Ortalyq kommýnıkatsııalar qyzmetindegi brıfıng barysynda ekstremızm men lańkestikke qarsy áreket jónindegi zertteýler nátıjesi týraly baıandaǵan saıasattanýshy Erlan Qarın qazirgi zamanǵy terrorızmge anyqtama berdi.
«Qazirgi ýaqytta terrorıstik uıymdardyń qurylymy burynǵydaı vertıkaldy qurylym bolýdan qaldy. Bular jelilik prıntsıppen qurylǵan, ortalyqtandyrylmaǵan, ortalyq basqarý júıesi joq, bytyrańqy deńgeıdegi uıym. Árbir top derbes formada qyzmet etedi. Jalpy, qazirgi zamanǵy terrorızm týraly aıtatyn bolsaq, bul - alýan túrli krımınaldyq qyzmetpen aınalysatyn toptardyń korporatsııasy», - deıdi Erlan Qarın.
Onyń aıtýyna qaraǵanda, terrorıstik uıymdardy ártúrli krımınaldyq qyzmetpen (máselen esirtki saýdasymen, adam saýdasymen, qarý-jaraq satý jáne t.b) aınalysatyn, osy qyzmettiń barlyq salasyn qamtıtyn úlken korporatsııa dep ataýǵa bolady.
«Barlyq terrorıstik uıymdardy basqaratyn biryńǵaı ortalyq jónindegi paıymdaý bul - qate tujyrym. Ondaı ortalyq ta, júıe de joq. Árbir óńirdegi terrorıstik uıymdar óz betimen, derbes qyzmet etip keledi», - dedi saıasattanýshy.
