Saıasattanýshy: Jańa Konstıtýtsııa jobasynyń avtory — halyq

ASTANA. KAZINFORM — Jańa Ata zań jobasyn jasaýǵa bir shoǵyr mamandar toby ǵana emes, qalyń el atsalysty. Bul týraly saıasattanýshy, Konstıtýtsııalyq reforma jónindegi komıssııa múshesi Marat Shıbutov «Konstıtýtsııalyq reforma jáne qoǵamdyq dıalog: keleshekke baǵdar» atty sarapshylar alańynda málimdedi.

— Negizinde, jańa Konstıtýtsııa jobasynyń avtory — tek qana jumys tobynyń 33 múshesi men Konstıtýtsııalyq reforma jónindegi komıssııanyń 130 múshesi ǵana emes. Egov jáne eOtinish arqyly usynystaryn jetkizgen 10 myńnan astam azamat ta — qujattyń avtory. Óıtkeni, biz olardyń da talap-tilekterin eskerdik, — dedi ol.

Saıasattanýshynyń sózinshe, jańa Ata zań jobasy, osylaısha, tar sheńberde ǵana talqylanbaı, myńdaǵan adamnyń qatysýymen daıyndaldy.

— Endi ary qaraı qujat referendýmda jalpyhalyqtyq daýys berý nátıjesinde qoldaý tapsa, bekitiledi. Referendýmda, zań boıynsha, daýys berýshilerdiń jartysynan astamy qatysýy kerek. Demek, qabyldanǵan jaǵdaıda, jańa Konstıtýtsııany bir top sarapshy ǵana emes, qalyń el qoldaǵan bolyp esepteledi. Halyqtyń saıası úderisterge qatysýy degen — osy, — dep túıindedi M. Shıbutov.

Aıta keteıik, buǵan deıin jańa Konstıtýtsııa jobasynyń ózegi adam jáne adam quqyqtary ekenin jazǵanbyz.