Saıasattanýshy: din saıası kúshke aınalmaýy kerek

ASTANA. KAZINFORM – Dinniń memleketten bólek bolýy dinı senim quqyǵyn shektemeıdi. Bul týraly saıasattanýshy Áıgerim Ábdirashıtova «Referendým-2026» onlaın marafonynda jańa Ata zań jobasyndaǵy 7-bapty talqylaý barysynda aıtty.

Onyń sózinshe, qazir elimizde túrli din ókilderi turady. Bir din ókiliniń quqyǵyn qorǵaıtyn ereje basqa bir din ókiliniń quqyǵyn shekteýi múmkin. Sondyqtan mundaı jaǵdaıda jalpyǵa ortaq normalar bolýy kerek. 

– Din adamnyń ómir saltyna, minez-qulqyna, ózgelermen qarym-qatynasyna áser etedi. Bul máseleler ár dinde ártúrli qarastyrylady. Al, kóp dindi ustanatyn halqy bar memlekette munyń bári zańmen rettelýi tıis. Din saıası kúshke aınalmaýy kerek. Din memleketten bólek bolýy qajet. Bilim berý, medıtsına t.b. salalarda jalpy halyqqa ortaq normalar zańmen bekitilýi tıis. Mysaly, dinı kózqarasyna baılanysty sábıine ekpe saldyrmaıtyn ata-analar da bar. Bul bolashaqta balanyń densaýlyǵyna, bilim alý múmkindigine, jalpy ómirine keri áser etýi múmkin, - dedi saıasattanýshy.

Sondaı-aq ol elimizde qandaı dindi bolsyn ustanýǵa shekteý joq ekenin eske saldy.

– Qandaı dindi ustansa da, azamattardyń óz erki. Din ustanýda shekteý joq. Biraq dinı senimnen týyndaǵan áreketter qoǵamdyq tártipti jáne basqa adamdardyń quqyǵyn buzatyn bolsa, onda, árıne, másele zańmen retteledi. Qaıtalap aıtsaq, qandaı dindi ustansańyz da, óz tańdaýyńyz. Alaıda qoǵam ishinde, kópshilik ortada ózgelerdiń quqyǵyn buzbaýyńyz kerek. Bul áıel quqyǵyna da qatysty sóz. Máselen, álemde dinı dogmaǵa urynǵan elderde qyz bala týsa, quqyǵy shekteledi. Qyz-kelinshekterdiń bilim alýyna, jumys isteýine, tipti, kóshege shyǵýyna da qatań shekteýler qoıylyp jatady. Mundaı jaǵdaılar kez kelgen demokratııalyq elde bolmaýy tıis. Ár adam óz quqyǵyn bilýi kerek, - dep túıindedi Á. Ábdirashıtova.

Eske salaıyq, buǵan deıin jańa Konstıtýtsııa halyqty Táýelsizdik pen Egemendikti qorǵaýǵa mindetteıtini jóninde sarapshy pikirin jarııalaǵan edik.