Saıasatkerler memlekettik qaıratkerge aınalýy kerek - Rýslan Grınberg
ALMATY. 15 sáýir. QazAqparat /Erlik Erjanuly/ - Saıasatker kelesi saılaýdy, al qaıratker bolashaqty oılaıdy.
Bul týraly Halyqaralyq menedjment akademııasynyń akademıgi, Reseı Ǵylym akademııasynyń Ekonomıka ınstıtýtynyń dırektory Rýslan Grınberg búgin Almatyda ótip jatqan 7-shi Táýekel-menedjmenti halyqaralyq konferentsııasynda aıtty.
«Bizdiń álem týrbolentti. Buryn oǵan boljam jasaý ońaı bolatyn. Eger jyl saıyn 5 paıyzdyq ósim bolsa, onda odan ary qaraı da qandaı da bir deńgeıde ilgerileý bolady dep josparlanatyn. Qazir ony eshkim bilmeıdi», deıdi Rýslan Grınberg. Ekonomıka ǵylymynyń doktory Nıý-Iork ýnıversıtetiniń professory Nýrıel Rýbınıdiń ulttyq deńgeıdegi kóshbasshy týraly oılaryna óziniń tolyq qosylatynyn bildirdi. Onyń paıymdaýynsha, saıasatkerler memlekettik qaıratkerge aınalýy kerek. Álemdik saıası, ekonomıkalyq jáne qarjylyq turaqtylyqtyń saqtalýyna olar ózderiniń de belgili bir deńgeıde jaýaptylyǵyn túsinýi qajet. Sondyqtan da ol «Úlken jıyrmalyqqa» úlken úmit artyp otyr.
