Saıasatker: QR Prezıdentiniń Ázerbaıjanda kólik jobasynyń ashylýyna qatysýy - erekshe oqıǵa

BAKÝ. QazAqparat -Baký-Tbılısı-Kars (BTK) jańa temirjol jobasy Ázerbaıjan, Túrkııa jáne Grýzııa úshin asa mańyzdy. Bul joba Qazaqstan úshin de úlken mańyzǵa ıe, dep esepteıdi «Atlas» zertteý ortalyǵynyń basshysy, saıasatker Elhan Shahınoǵly. Bul týraly «QazAqparat» HAA-nyń Ázerbaıjan Respýblıkasyndaǵy menshikti tilshisi habarlady.

«Qazaqstan Prezıdenti Nursultan Nazarbaev pen Túrkııa Prezıdenti Redjep Taıyp Erdoǵannyń Baký-Tbılısı-Kars temirjol baǵytynyń ashylýyna qatysýy - Baký úshin mańyzdy oqıǵa. Temirjoldyń ashylýyna Qazaqstan Prezıdentiniń qatysatyny týraly jańalyq álemdik qoǵamdastyqtyń jobaǵa degen qyzyǵýshylyǵyn arttyra túsedi», - deıdi sarapshy.

Onyń paıymynsha, Baký-Tbılısı-Kars baǵyty boıynsha Qazaqstan men Qytaı óz taýarlaryn Eýropaǵa eksporttaı alady jáne kerisinshe ımportqa da jol ashylmaq. Bul Qytaı úshin teńiz arqyly ótýmen salystyrǵanda, áldeqaıda qysqa jol. Eger Qytaı taýarlarynyń bir bóligin BTK arqyly jetkizer bolsa, bul Qazaqstannyń tranzıtti memleket retindegi mańyzdylyǵyn arttyra túsedi.

«Qazaqstan men Ázerbaıjan aldynda taǵy bir mindet bar. Eki el Kaspıı arqyly kólik-logıstıka júıesin damytyp, jaqsartýy tıis», - dedi Shahınoglý.

«N.Nazarbaevtyń aldyńǵy sapary eki eldiń ekijaqty ekonomıkalyq qarym-qatynasty damytýǵa nıetin kórsetti. Birlesken kásiporyndar  ashyp, ortaq kúshpen sheteldik ınvestorlardy tartý qajet. Buǵan múmkindik jetkilikti. Qazaqstan men Ázerbaıjan - óz aımaqtaryndaǵy ekonomıkalyq kóshbasshylar», - dep túıdi sarapshy.