«Saıasat sahnasyna bekinip shyqqan partııanyń qamsyz jatýyn qoǵam quptamaıdy» - respýblıkalyq basylymdarǵa sholý
***
«Aıqyn» gazetiniń jazýynsha, QR Prezıdenttigine kandıdattardyń memlekettik tildi erkin meńgergendigin anyqtaý jónindegi lıngvıstıkalyq komıssııaǵa emtıhan tapsyrǵan úshinshi úmitker Musaǵalı Dýambekov úshin keshegi sársenbi sátti boldy. Memlekettik tildi jetik biletindigin dáleldegen kandıdat mamandardyń oń baǵasyn alyp, naýqannyń kelesi kezeńine ótti. Lıngvıstıkalyq komıssııanyń tóraǵasy Myrzataı Joldasbekovtiń pikirinshe, úmitker jazba jumysyn oıdaǵydaı oryndaǵan. Taqyrypty asha bilgen. Sóılem quraýynda da kemshilik kezdespegen. «Bizge belgili bolǵandaı, kezekten tys prezıdent saılaýyna keminde 400 halyqaralyq baqylaýshy qatysady. Olar 7 aqpannan 28 naýryzǵa deıin tirkelýi tıis. OSK múshesi Marat Sársembaevtyń aıtýynsha, Eýropadaǵy qaýipsizdik jáne yntymaqtastyq uıymynyń ókilderi ózderiniń notalaryn joldap, saılaýǵa qatysatyndyqtaryn jáne keminde 400 baqylaýshy jiberetindikterin jetkizgen. TMD-ǵa múshe elderden de baqylaýshylar keledi degen boljam bar», - dep jazady basylym. Saıası sahna kórigin qyzdyratyn saılaý jáne oǵan qatysatyn úmitkerler jaıynda egjeı-tegjeıli bilgińiz kelse, «Saılaýǵa 400 halyqaralyq baqylaýshy qatysady» degen maqalaǵa nazar salyńyz.
«Úmitkerler» saılaýǵa túsýdi oıynshyqqa aınaldyryp aldy». Osyndaı taqyryppen «Aıqyn» gazetiniń beısenbilik sanynda jaryq kórgen shaǵyn suhbat Qazaqstan saıası konıýnktýra ortalyǵynyń vıtse-prezıdenti Nurlan Erimbetovpen arada órbigen. Aldaǵy bolar kezekten tys Prezıdenttik saılaý jaıynda órbigen ekeýara áńgime barysynda ol: «Menińshe, ultshyldar da osy naýqanǵa óziniń úlesin qosýy tıis dep esepteımin. Eger olar shynaıy kúsh bolsa, mindetti túrde prezıdent saılaýyna óz úmitkerin usynsa kerek. Sebebi osyndaıda adamnyń barlyq jigeri, oılary aıqyndalady. Ár jerden, ár mıtıngiden, ár gazetten anda-sanda óziniń daýysyn estirtip qoıý - óz aldyna, Elbasymen úlken saıysqa túsý, básekelesý - múldem basqa áńgime. Óıtkeni oǵan úlken erik-jiger, kúshti uıymdastyrý jumystary kerek», - dep pikir bildirgen.
***
«Ádettegi Májilistiń dástúrli sársenbilik basqosýynda 28 depýtat bıliktiń basqa tarmaǵyna saýal joldady. Taǵy da sol ádettegideı, 28-diń altaýy ǵana taza memlekettik tilde sóz saptasa, qalǵany orystyń tilimen qalaýlylar otyrysynyń «sánin» kirgizdi», - dep jazady «Alash aınasy» gazeti búgingi nómirinde jarııalanǵan «Bolashaqtyń» «burandasy» nege bosap barady?» degen maqalasynda. Basylymnyń atap ótýinshe, Úkimet basshysynyń atyna depýtattyq saýal joldaǵan depýtat Saǵynbek Tursynovtyń alǵa tartqan derekteri boıynsha, 17 jyldyń ishinde álemniń eń úzdik oqý oryndarynda 3 myńǵa jýyq qazaqstandyq bilim alyp, maman atandy. Oqýyn jalǵastyryp jatqan 4 myńnan astam azamat bar. Alaıda sońǵy ýaqytta osy baǵdarlama arqyly memleket qarjysymen elge oralǵan jastardyń jumysqa ornalasýy túıindi máselege aınalyp otyr. Máselen, resmı derekterge sáıkes «eki qolǵa bir kúrek» taba almaı júrgen «bolashaqtyqtyń» sany 400-den asady. Al keıbir aqparattar boıynsha álgi sheteldiń joǵary oqý ornyn tamamdaǵan jumyssyzdardyń sany 600-ge jetip jyǵylady eken.
Osy basylymnyń turaqty «Dat!» aıdarynda QR Parlamenti Senatynyń depýtaty Qýanysh Sultanovpen aradaǵy suhbat «Saıasat sahnasyna bekinip shyqqan partııanyń qamsyz jatýyn qoǵam quptamaıdy» degen taqyryppen berilgen. Gazet tilshisiniń barlyq saýaldaryna tuşymdy jaýap bergen senator: «Bizge eshqandaı da memleket qaısybir máselege qatysty «mynany bylaı iste, bul emes, ana jolmen júr» dep tikeleı nusqaý bere almaıdy. Biraq ondaı nusqaý bere almaıdy eken dep, Qazaqstan da dúnıejúzilik qaýymdastyqtyń pikirine beıjaı qaramasy anyq. Qazaqstan - dúnıejúzilik qoǵamdastyqtyń mindetti túrdegi bir múshesi. Bizdiń elde qabyldanǵan halyqaralyq bastamalardyń syrttaǵy jurttan qoldaý tabýyna ózimiz de yqylastymyz», - deıdi.
***
«Aqordada Memleket basshysy Nursultan Nazarbaev «Glencore International AG» kompanııasynyń bas dırektory Aıvan Glaızenbergti qabyldady», - dep jazady «Kazahstanskaıa pravda» gazeti. Áńgimelesý barysynda birqatar eki jaqty yntymaqtastyq máselesi talqylanǵan. «Kezdesý kezinde biz «Glencore» kompanııasynyń Qazaqstandaǵy ınvestıtsııalyq jobalaryn, elde bizdiń qyzmetimizdiń aıasyn keńeıtý máselesin talqyladyq. Jaqynda biz «Qazmyrysh» AQ kásipornyna mys qorytý jabdyqtaryn ornatyp, 850 mıllıon AQSh dollary kóleminde ınvestıtsııa tarttyq. Jabdyqtar osy jyldyń naýryzynda iske qosylady. Budan bólek, biz «Altyntaý» altyn karerin zertteý máselesin talqyladyq. Kompanııa karerge 657 mıllıon dollar kóleminde ınvestıtsııa tartyp otyr. Qazir karerdiń qýaty 70 paıyzdy quraıdy, al sáýirde ol 100 paıyzǵa deıin jetedi», - depti A. Glaızenberg jýrnalısterge arnalǵan brıfıngte.
