Saıasat Nurbek JOO-larda psıhologııalyq qyzmetter nege kúsheıtilgenin aıtty

ASTANA. KAZINFORM — Ǵylym jáne joǵary bilim mınıstri Saıasat Nurbek joǵary oqý oryndarynda stýdentter arasynda sýıtsıdke jol bermeý is-sharalaryna túsinik berdi.

Búgin Májilistegi parlamenttik tyńdaýdan keıin tilshiler mınıstrden Nazarbaev Ýnıversıtetindegi stýdentterdiń sýıtsıdine qatysty istiń mán-jaıyn surady.

— Bizde eki naqty jaǵdaı boldy. Úlken tragedııa. Polıtsııa departamenti men Іshki ister mınıstrligi ázirge túpkilikti qorytyndy bergen joq. Aldyn ala derek boıynsha otbasyna qatysty máseleler bolǵan. Sonymen qatar, jastar arasynda jaýapsyz mahabbat sııaqty faktorlar baıqalyp jatady, jeke kelispeı jatady. Jalpy, bul baǵytta ne istelip jatyr? Birinshiden, biz tek Nazarbaev Ýnıversıtetinde ǵana emes, basqa da joǵary oqý oryndarynda psıhologııalyq qyzmetti kúsheıttik. Osy maqsatta arnaıy sheshimder qabyldap, bıýdjetti ulǵaıtyp, shtattyq jumys oryndaryn quryp jatyrmyz. Ekinshiden, qazir bul jumysqa óte aýqymdy ádistemelik sholý jasaldy, — dedi S. Nurbek.

Onyń aıtýynsha, qazir Eýropa odaǵynyń jobasy aıasynda úlken ádistememen jumys jalǵasyp otyr. Bul ádisteme sýıtsıdtik jaǵdaıdy erte kezeńde anyqtaýǵa múmkindik beredi. Pılottyq joba boıynsha osy baǵyttaǵy synaqtar Nazarbaev Ýnıversıtetinde qamtyldy.

— Endi ony basqa ýnıversıtetterge taratqymyz keledi. Psıhologtar arnaıy oqýdan ótedi, — dedi mınıstr.

Eske salsaq, bıyl maýsym aıynda Nazarbaev ýnıversıtetinde stýdent ólimine qatysty qylmystyq is qozǵaldy.