Saıasat Nurbek joǵary bilim salasyndaǵy 2 rekordty atady

ASTANA. KAZINFORM — Bıyl oqý jylynda elimizge 31 500 sheteldik stýdent keldi. Bul týraly Astana halyqaralyq forýmy aıasynda Ǵylym jáne joǵary bilim mınıstri Saıasat Nurbek aıtty. 

— Sońǵy 3 jyldyń ishinde elimizde eń myqty 38 sheteldik ýnıversıtettiń fılıaly ashyldy. Osy jumystyń arqasynda 2 tarıhı rekord boldy. Bıyl oqý jylynda Qazaqstanǵa 31 500 sheteldik stýdent keldi. Bul — tarıhı rekord. Onyń ústine tarıhymyzda tuńǵysh ret TMD elderinen stýdentter kóbirek kelip otyr. Reseıden 3 myńnan astam, Qytaıdan 2 myńnan astam, Pákistan men Úndistannan 12 500, Mońǵolııa, Túrkııa, Ázerbaıjan, Nıgerııa, Ońtústik Afrıkadan stýdentter keldi. Kóshi-qon saldosy aýysyp jatyr, — dedi mınıstr.

Osy oraıda ol shetelde bilim alýǵa ketetin Qazaqstan jastarynyń da kóp ekenin jasyrǵan joq.

— Biraq, sheteldik ýnıversıtetterdiń fılıaldaryn ashý arqyly osy kóshi-qondy keri baǵyttaý maqsatyn qoıdyq. Qazirdiń ózinde 38 fılıalda 10 myńnan astam stýdent bilim alyp jatyr. Demek, Qazaqstan talapkerlerge eń myqty brıtandyq, amerıkalyq, nemis, frantsýz, káris, qytaı syndy eń damyǵan elderdiń bilimin alýǵa múmkindik beredi, — dedi Saıasat Nurbek.

Aıta ketelik Saıasat Nurbek Garvardta oqyp jatqan otandastarymyz jaıynda pikir bildirgen edi.