Saıasat Nurbek UBT-da 140 ball jınaǵan Qosshy qalasynyń túlegin quttyqtady
ASTANA. KAZINFORM — Ǵylym jáne joǵary bilim mınıstri Saıasat Nurbek Ulttyq biryńǵaı testileýde bıyl elimizde 140 ball jınaǵan ekinshi talapker – Aqmola oblysynyń Qosshy qalasynyń túlegi Aıym Erjanovany quttyqtady
Mınıstrliktiń málimetinshe, bul jetistik IELTS halyqaralyq sertıfıkatynyń baldaryn UBT baldaryna aýystyrý jáne UBT nátıjesin esepke alý arqasynda múmkin boldy.
«Aıym Erjanovany erekshe jetistigimen quttyqtaımyn. Bul qajyrly eńbek pen bilimge degen umtylystyń nátıjesi. Sizdiń jetistigińiz barlyǵymyzdy shabyttandyrady jáne qazaqstandyq jas talanttardyń halyqaralyq arenada úlken bıikterge jetýge qabiletti ekenin kórsetedi. Sizge oqýda jáne bolashaq mansapta odan ári tabys tileımin!» - dedi mınıstr.
Mınıstrmen kezdesýge Aıymdy qoldaýǵa onyń jaqyndary da keldi, olar UBT nátıjesin bilgende qatty qýanǵanyn jáne úmitteri aqtalǵanyn aıtty. Saıasat Nurbek talapkerdiń jaqyndaryna nemereleriniń jetistikterinde olardyń kórsetken qamqorlyǵy mańyzdy ról atqarǵanyn atap ótip, bilimine baǵa jetpes qoldaýy men qosqan úlesi úshin alǵysyn bildirdi.
Aıym Erjanova UBT-ny tórt pán boıynsha tapsyryp, 90 ball jınady. Sonymen qatar ol «Aǵylshyn tili» páni boıynsha baldardy aýystyrý úshin IELTS halyqaralyq sertıfıkatyn usyndy. Erejelerge sáıkes, IELTS baldaryn UBT baldaryna aýystyrý bilim berý granttaryn taǵaıyndaý konkýrsyna ótinish berip, sertıfıkattyń rastyǵy anyqtalǵan soń JOO-nyń qabyldaý komıssııasy arqyly júzege asyrylady. Osylaısha Aıym 140 baldyń ekinshi ıegeri atandy jáne konkýrsqa eń joǵary balmen qatysty.
«Eńbegim men umtylysym aqtalyp, ony baǵalap jatqandaryńyzǵa úlken alǵysymdy bildiremin. Bul jetistik meniń ǵana emes, maǵan barynsha qoldaý kórsetken jandardyń arqasynda. Meniń jetistigim bilim men joǵary nátıjege umtylatyn basqa talapkerlerge de úlgi bolady dep úmittenemin», - dep qýanyshymen bólisti.
Mınıstr sondaı-aq UBT-daǵy qazaqstandyq talapkerlerdiń joǵary nátıjeleri elimizde sapaly bilim alýǵa umtylystyń kórsetkishi bolyp tabylatynyn atap ótti.
Esterińizge sala keteıik, 2021 jyldan beri alǵash ret túlekter UBT-da 140 ball jınady. Kezdesý sońynda Aıymnyń ájesi bata berip, barlyq túlekterge ózderi armandaǵan bıikterge jetýdi tiledi.
