Saıasat Nurbek iri kásiporyndar ınfraqurylymyn ǵalymdarǵa synaq alańy retinde berýdi usyndy

ASTANA. KAZINFORM – Ǵylym jáne joǵary bilim mınıstri Saıasat Nurbek Úkimet otyrysynda ǵylymdy kommertsııalandyrýǵa kedergi keltirip turǵan faktorlardy atady.

- Ǵylymdy kommertsııalandyrý protsesi belsendi júrý úshin ne isteý kerek, - dep surady Premer-mınıstr Oljas Bektenov.

Mınıstrdiń sózinshe, bul baǵytta tórt negizgi másele bar.

- Birinshiden, iri kásiporyndardyń tenderlik protsedýralarynda ǵylymı yntymaqtastyq krıterıılerin engizse abzal bolar edi. Ekinshiden, iri kásiporyndar osy ǵylymı-tehnologııalyq sessııalarǵa qatysyp, ózderiniń ınfraqurylymyn synaqqa qoldanýǵa bergenderi durys bolar edi. Mysaly, «Karmet» zaýyty úsh ýnıversıtetpen bes ǵylymı-zertteý ınstıtýtyna ınfraqurylymyn berip, tyǵyz jumys istep jatyr, - dedi vedomstvo basshysy.

Sondaı-aq, ol shetelden joǵary tehnologııaǵa qurylǵan jabdyqtar alýda qıyndyqtar bar ekenin aıtty.

- Úshinshiden rásimdeýdegi bıýrokratııalyq máseleler bar. Shıkizattyń kelýi, syrttan qural-jabdyq kirgizý kezinde kedendik rásimder kóp ýaqyt alady. Qazirgi tańda zańnyń aıasynda memlekettik satyp alý protsesi ózgerip jatyr. Ony biz Salyq kodeksiniń ishine engizdik. Biraq sheteldik jabdyqtardy kedende rásimdeý áli kúnge deıin úlken másele bolyp tur. Ónimdi sertıfıkattaý, retteý, ol da bir másele bolyp jatyr.

Tórtinshiden, óńirlik ǵylymdy damytý kerek. Zań aıasynda jergilikti ákimdikterge óte jaqsy ókilettikter berilip, ǵylymı keńester quryldy. Biraq bul keńesterdiń jumysyn júıeleý, jaýapty adamdardy taǵaıyndaý, bizdiń nusqaýlyqtarmen birtutas júıeni qalyptastyrý da úlken másele bolyp otyr, - dedi Saıasat Nurbek.

Aıta ketý kerek, ótken aptada «Bolashaq» jáne «Ǵylymı taǵylymdamalar» stıpendııasyna qujat qabyldaý bastaldy.