Saıasat Nurbek óńir ákimderinen JOO-lardy kompıýtermen jabdyqtaý úshin qarajat bólýdi ótindi
ASTANA. KAZINFORM – Búgin Úkimet otyrysynda Ǵylym jáne joǵary bilim mınıstri Saıasat Nurbek óńir ákimderinen joǵary oqý oryndaryn kompıýtermen jabdyqtaý úshin qarajat bólýdi ótindi.
- Jasandy ıntellekt jáne tsıfrlandyrý mınıstrligi jáne Astana Hub-pen birlesip, ýnıversıtetter bazasynda Tomorrow School jobasyn iske asyryp jatyr. Joba halyqaralyq ádisteme negizinde barlyq óńir turǵyndary úshin táýlik boıy qoljetimdi formatta uıymdastyrylady. Qazirgi tańda 4 óńirde jobany iske asyrý úshin qajetti oqý orynjaılary bólinip, kompıýterlik tehnıkamen tolyq qamtamasyz etý máseleleri sheshildi, - dedi ol.
Mınıstrdiń aıtýynsha, jobany júzege asyrýǵa Aqmola, Qostanaı jáne Almaty oblystary belsendi qoldaý kórsetip otyr.
- Qalǵan 15 óńirde kompıýterlik tehnıkamen qamtamasyz etý máseleleri pysyqtalý ústinde. Osyǵan baılanysty, Oljas Abaıuly, óńir ákimdikterine joǵary oqý oryndaryn kompıýterlik tehnıkamen jabdyqtaýǵa arnalǵan qarajat tartý boıynsha qosymsha tapsyrma berýdi suraımyz, - dedi Saıasat Nurbek Premer-mınıstr Oljas Bektenovke.
Buǵan deıin 100 myń stýdent JI boıynsha tereńdetilgen kýrstardy oqıtynyn jazǵan edik.