Saıasat Nurbek latyn álipbıine kóshý merzimi týraly: Sál sabyr saqtańyzdar

ASTANA. KAZINFORM — Májilis depýtaty Ermurat Bapı jasandy ıntellektini damytýǵa arnalǵan parlamenttik tyńdaýda Úkimet múlelerinen Qazaqstan qashan latyn álipbıine tolyqqandy kóshetinin surady.

— Bul qarip — Microsoft-tyń biryńǵaı baǵdarlamalyq platformasyna shyǵatyn tóte jol. Biz qazir kırıllıtsada otyrmyz. Onyń ishindegi 12 tól árpimiz baǵdarlamaǵa túsiniksiz. Qazir biz qazaq, orys, aǵylshyn tilin qatar paıdalanýdyń saldarynan orasan zor shyǵyn tartyp jatyrmyz. Kósheniń ataýyn da, joldaǵy belgilerdi de, bárin úsh tilde jazamyz. Onyń bári — zor shyǵyn. Google, Microsoft, You Tube sııaqty platformalar qazaq tilin qabyldaýǵa daıyn. Biraq olarǵa birtutas standart qajet. Bul jóninde sarapshylardyń aqparaty jeterlik. Latyn qarpi — qazaq tilin álemdik júıege tikeleı qosatyn tóte jol, qazaq tilin táýelsiz til etetin múmkindik. Latyn qarpine qashan kóshetinimiz týraly memlekettik josparymyz bar ma? Bul máseleni saıası sheshim shyǵaratyn Prezıdenttiń aldyna qoıatyndaı oılaryńyz bar ma, — dedi ol.

Depýtat Jańa Qazaqstanǵa latyn álipbıi aýadaı qajettigin atap ótti.

— Jańa ǵana Henrık fon Sheıl myrza (Dúnıejúzilik ekonomıkalyq forýmnyń sarapshysy, Eýropalyq Odaqtyń Jasandy ıntellekt týraly zańyn ázirleýshiler tobynyń múshesi) jasandy ınttelektini bıorevlıýtsııa dep atady. Ltayn qarpin kóshpesek, jýyqta osy bıorevolıýtsııanyń sońynda bir aıaǵymyz aqsańdap qalamyz. Latyn qarpiniń osy otyrǵandardyń ishinde kóbimizge qajet bolmaýy múmkin. Ol jas urpaqqa kerek, Jańa Qazaqstanǵa kerek, — dedi Ermurat Bapı.

Ǵylym jáne joǵary bilim mınıstri Saıasat Nurbek bul jumys jospar boıynsha, júıeli túrde atqarylyp jatqanyn álim etti.

— Bul jumys birneshe jyl boıy, júıeli túrde atqarylyp kele jatyr. Birneshe nusqalary da shyqty. Qazirgi tańda birneshe top, til tanýshylar, lıngvıst, fılolog ǵalymdar áli bir mámlege kelmedi. Men naqty aıtaıyn sizge. Bul jumysty bizdiń mınıstrlik úılestirip otyr. Óte kóp saldary shyqty. Onyń ishinde ózińiz aıtqan tsıfrlyq máseleler de bar. Búkil qujat aınalymyn, kóshe ataýlaryn, bárin jańa álipbıge kóshirý úlken ekonomıkalyq shyǵyndarǵa ákeledi. Osynyń bárin eskere otyryp, ǵylymı, fonetıkalyq, orfografııalyq, orfoepııalyq turǵydan ólshep qana kóshemiz. Sondyqtan sál sabyr saqtańyzdar. Jumysty jalǵastyryp jatyrmyz. Jaqyn arada aqparat qosymsha beremiz. Sál sabyr saqtap jumys tobynyń tolyqqandy jumys atqarýyna ruqsat berseńizder, — dedi mınıstr.

Buǵan deıin Jasandy ıntellekt jáne tsıfrlyq damý mınıstrligi jańa logotıpin tanystyrǵanyn jazǵan edik.