Saıasat Nurbek QHR Bilim mınıstri Hýaı Tszınpenmen kezdesti
ASTANA. KAZINFORM – Qytaı Halyq Respýblıkasynyń prezıdenti Sı Tszınpınniń Qazaqstanǵa resmı sapary aıasynda QR Ǵylym jáne joǵary bilim mınıstri Saıasat Nurbektiń Qytaı Halyq Respýblıkasynyń Bilim mınıstri Hýaı Tszınpenmen ekijaqty kezdesýi ótti.
Saıasat Nurbek ózi sózinde Hýaı Tszınpendi eki el basshylarynyń qatysýymen Astana International University bazasynda Beıjiń Til jáne mádenıet ýnıversıtetiniń fılıalynyń ashylýymen quttyqtady. Sondaı-aq L. Gýmılev atyndaǵy EUÝ bazasynda Lý Bannyń ekinshi sheberhanasyn ashyp jatqany úshin alǵysyn bildirdi.
Kezdesý aıasynda taraptar eki el arasynda stýdentterdiń bilim almasýy, Qazaqstan azamattary úshin Qytaı tarapynan bólinetin granttar sanyn ulǵaıtý týraly máselelerdi talqylady. Sondaı-aq elimizdegi Qytaıdyń jetekshi joǵary oqý oryndarynyń (CityU, BLCU jáne JMPÝ) fılıaldaryna granttar (stıpendııalar) bólýge, QHR joǵary oqý oryndary janyndaǵy zertteý jáne ǵylymı ortalyqtarda qazaqstandyq ǵalymdardyń (500 ǵalym) ǵylymı taǵylymdamadan ótýine járdemdesý týraly máseleler kóterildi.
«Búgin eki jaqty kelissózder barysynda Memleket basshysy Qasym-Jomart Kemeluly Toqaev eki el arasynda ǵylym jáne bilim salasyndaǵy yntymaqtastyq ta nyǵaıyp kele jatqandyǵyn basa atap ótti. Beıjiń til jáne mádenıet ýnıversıtetiniń fılıalynyń jáne ekinshi «Lý Ban sheberhanasy» ashylýynyń kýási boldyq. Oqý oryndary jaqyn arada óz nátıjesin kórsetedi dep úmittenemiz. Búgin Qazaqstan úshin de, Qytaı úshin de aıtýly kún dep aıtýǵa bolady», - dedi Saıasat Nurbek.
Qytaı Halyq Respýblıkasynyń Bilim mınıstri Hýaı Tszınpen óz kezeginde Qytaıdyń joǵary oqý oryndarynda bilim alatyn qazaqstandyq jastardyń sany, joǵary oqý oryndary fılıaldarynyń ashylýy, ǵylym salasyndaǵy birlesken jobalar eki el yntymaqtastyǵynyń nyǵaıýynyń nyshany ekendigin atap ótti.
