Saıasat Nurbek qandastarǵa qatysty talqylanǵan usynystar týraly aıtty
«Ulttyq keńestiń áleýmettik máseleleri boıynsha toby bilim, ǵylym, densaýlyq saqtaý, eńbek naryǵyn damytý, til, kóshi-qon boıynsha usynystar paketterin daıyndap, tıisti mekemelermen tyǵyz jumysty atqardyq. Jumystardy eń tómengi deńgeıden bastadyq, sebebi negizgi máseleler sol jerde sheshiledi. Atap aıtqanda, joǵary bilim jáne ǵylym, mektepke deıingi jáne orta bilim, tehnıkalyq jáne kásiptik bilim, sondaı-aq eńbek naryǵyn boljaý men biliktilikti arttyrý turǵysynda usynystar paketi daıyndaldy», - dedi S.Nurbek Ulttyq qoǵamdyq senim keńesiniń otyrysynda.
Onyń aıtýynsha, Densaýlyq saqtaý mınıstrligimen yntymaqtastyq aıasynda densaýlyq saqtaý salasyndaǵy jumys tıimdiligin arttyrý boıynsha usynystar paketi daıyndaldy.
«Qazirgi ýaqytta osy jumysty nyǵaıtý kerek. Densaýlyq saqtaý salasynda áli de tyǵyz baılanys ornatylmaı jatyr», - dedi ol.
Budan bólek, Saıasat Nurbek Ulttyq keńestiń áleýmettik máseleleri boıynsha tobynda qandastarǵa qatysty qaralǵan birneshe usynysty jetkizdi. Birinshi – sheteldegi etnıkalyq qazaqtarǵa jerdi paıdalaný quqyǵyn berý. ıAǵnı shetelden elimizge qonystanǵan qandastarǵa qatysty bolyp otyr. Bul qazir óte qyzý talqylanyp jatqan másele.
«Qandastarymyz elge kelgende, olardyń jeke kýálikterinde, tólqujattarynda týǵan jeri retinde basqa memleket jazylady. Ol azamattyq alǵan jaǵdaıda, Qytaı nemese basqa elde dúnıege kelgendigi týraly málimet alynyp tastalsyn. Atap aıtqanda, Qazaqstannyń tolyqqandy azamaty boldy, sondyqtan onyń qaıda týǵandyǵy týraly málimetti kórsetpeý usynysy bar», - dedi ol Ulttyq keńes otyrysynan keıin «QazAqparat» tilshisiniń saýalyna jaýap bere otyryp.
Taǵy bir usynys 18 qarasha kúnin Ulttyq kóshi-qon kúni dep belgileýge qatysty.
«Jalpy, úsh aıdyń ishinde memlekettik organdarmen óte egjeı-tegjeıli jumys istedik», - dedi ol.
