Saıasat Nurbek ınnovatsııalyq shtab qurýdy usyndy
ASTANA. KAZINFORM – Innovatsııalar tek bir vedomstvo aıasynda ǵana emes, búkil memlekettik júıe deńgeıinde úılestirýdi talap etetin kúrdeli salaaralyq mindet. Bul týraly Úkimet otyrysynda Ǵylym jáne joǵary bilim mınıstri Saıasat Nurbek aıtty.
- Memleket basshysynyń tapsyrmasyna sáıkes ınnovatsııalyq qyzmet Ǵylym jáne joǵary bilim mınıstrliginiń quzyryna ótti. Osy tapsyrmany oryndaý aıasynda mınıstrlikke Jasandy ıntellekt jáne tsıfrlyq damý mınıstrliginiń jekelegen mindetteri men fýnktsııalary berildi.
Bul sheshim ınnovatsııalar ǵylym, ýnıversıtetter jáne zertteý ortalyqtary bazasynda qalyptasatyn halyqaralyq tájirıbege sáıkes keledi. Alaıda, ınnovatsııalar tek bir vedomstvo aıasynda ǵana emes, búkil memlekettik júıe deńgeıinde úılestirýdi talap etetin kúrdeli salaaralyq mindet ekenin túsiný mańyzdy, - dedi mınıstr.
Onyń málimetinshe, Qazaqstan Global Innovation Index reıtınginde 81-orynda, al Garvard ýnıversıtetiniń Ekonomıkalyq kúrdelilik ındeksinde 55-orynda tur.
- Aıta ketý qajet, GII – 78 ındıkatordy qamtıtyn keshendi halyqaralyq ındeks. Atalǵan reıtıngtegi eldiń orny bir ǵana vedomstvonyń qyzmetiniń nátıjesi emes, ınnovatsııalyq damýdyń negizgi baǵyttary boıynsha 10-nan astam memlekettik organnyń úılesimdi jumysynyń nátıjesi sanalady. Sonymen qatar ınnovatsııalyq qyzmettiń mundaı salaaralyq sıpaty vedomstvoaralyq ózara is-qımyldyń joǵary deńgeıin jáne ınstıtýtsıonaldyq deńgeıde biryńǵaı úılestirýdi talap etedi. Osyǵan baılanysty barlyq memlekettik organdar men damý ınstıtýttarynyń is-qımylyn úılestirýge múmkindik beretin biryńǵaı úılestirýshi tetik retinde Innovatsııalyq shtab qurý usynylady. Alaıda ınnovatsııalardy tolyqqandy damytý úshin tek úılestirý jetkiliksiz, óıtkeni júıede basqa da problemalyq máseleler saqtalýda, - dedi Saıasat Nurbek.
Buǵan deıin Úkimet otyrysynda ınnovatsıchlardy damytý máselesi talqylanatynyn jazǵan edik.
