Saıasat Nurbek: Halyq tabysyn arttyrýǵa arnalǵan baǵdarlama iske qosylady

NUR-SULTAN. QazAqparat – Qazaqstan halqynyń tabysyn arttyrýdyń 2022-2024 jyldarǵa arnalǵan «Mamandyǵym-bolashaǵym» baǵdarlamasy iske qosylady. Bul týraly QR Ǵylym jáne joǵary bilim mınıstri Saıasat Nurbek elordada ótip jatqan «Adamı kapıtal – jańa Qazaqstan damýynyń negizgi resýrsy» atty ǵylym jáne joǵary bilim forýmynda málim etti, dep habarlaıdy QazAqparat tilshisi.

«Qazir halyq tabysyn arttyrýdyń 2022-2024 jyldarǵa arnalǵan «Mamandyǵym-bolashaǵym» baǵdarlamasy boıynsha qarjylandyrý jumysy júrip jatyr. Atalǵan jobaǵa qatysatyn 20 joǵary oqý oryndarynyń tizimi jýyqta habarlanady. Joba maqsatyna sáıkes óńirlik jáne salalyq joǵary oqý oryndary suranysqa ıe mamandardy daıarlaýdy óz moınyna alyp, jergilikti ozyq tájirıbe taratý ortalyqtaryna aınalýy tıis», - dedi Saıasat Nurbek.

Mınıstrdiń aıtýynsha, halyq tabysyn arttyrýǵa arnalǵan «Mamandyǵym-bolashaǵym» jobasy aıasynda mynadaı jumys qolǵa alynady:

1) Aldaǵy 5 jylǵa óńir nemese sala ınnovatsııalary men kadr qajettiligine forsaıt-zertteýler jáne boljam júrgiziledi;

2) Ár óńir mamandyqtar boıynsha kásipter atlasyn ázirlep, mamandar daıarlaıdy:

3) Kásipter atlasyna sáıkes jańa bilim berý baǵdarlamalaryn ázirleý jáne ózekti etý;

4) Jańarǵan bilim berý baǵdarlamalary úshin professorlyq-oqytýshylyq quram daıarlaý.

«Tutastaı alǵanda, joǵary oqý oryndary sol óńirdegi ınnovatsııalyq, ǵylymı-tehnologııalyq, kadrlyq jáne óndiristik belsendilikti jınaqtaıtyn orynǵa aınaldyrý kerek. Ózara is-qımyl úshin strategııalyq tuǵyrnama bolýy tıis. Osy turǵyda, bizde QR Tsıfrlyq damý, ınnovatsııalar jáne aeroǵarysh ónerkásibi mınıstrligimen olardyń aımaqtyq habtaryn óńirlik ýnıversıtetterdi damytý baǵdarlamasymen ushtastyrý jóninde aldyn ala ýaǵdalastyq bar ekenin atap ótkim keledi», - deıdi S. Nurbek.